Ave Caicoli, Dili, Timor-Leste

info@pdhj.tl

  • tp

PDHJ Halo Enkontru Públiku Ho Funsionariu Ministériu Edukasaun Munisipiu Dili

Dili– Iha loron 11 fulan Agustu 2016, Provedoria dos Direitos Humanos e Justiça (PDHJ) Diresaun Nasional Fiskalizasaun no Rekomendasaun realiza enkontru públiku kona-ba “ Rezultadu Monitorizasaun Programa Merenda Eskolar Iha Timor-Leste”. Munisipiu ne’ebé sai hanesan alvu monitorizasaun husi ekipa Provedoria mak hanesan Munisipiu Dili, Ermera, Ainaro, Viqueque no Rejiaun Administrativa Espesial Oe-cusse Ambeno (RAEOA).

Diretur Edukasaun Munisipiu Dili, Duarte Braganza iha abertura ba atividade ne’e hateten katak, enkontru públiku ne’ebé organiza husi Instituisaun Provedoria dos Direitos Humanos e Justiça (PDHJ) hanesan parte importante tebes mai ita nu’udar funsionariu públiku iha Ministériu Edukasaun hodi hatene progresu servisu iha Ministériu relevante, liu-liu kona-ba implementasaun Programa Merenda Eskolar (PME) iha Timor laran tomak.

Diretur hatutan, implementasaun PME hanesan programa Governo central nia polítika ne’ebé hodi hadia estudantes sira iha eskola ensino baziku nia saúde liu husi programa ne’e. Importante liu mak Diretores no Coordenadores eskolar sira tenke jere di-diak jestaun kona-ba PME ne’ebé mak agora implementa iha eskola.

Diretur mos apela ba Direitores, Inspetores, Superentendentes no Coordenadores eskolar sira atu kontrola di-diak atividade implementasaun PME iha eskola ida-idak, atu nune’e iha futuru la bele monu ba failansu.

Iha fatin hanesan, Adjunta Provedor, Dra. Jesuina M. F. Gomes, MPA, hateten ba partisipantes sira katak, objetivu husi sesaun enkontru públiku ne’e hanesan parte ida atu rekolha tan pontus-pontus informasaun adisional balun molok atu públika relatoriu ne’e.

Adjunta husu ba partisipantes sira atu fó sira nia opiniaun no komentariu kona-ba programa merenda eskolar ne’ebé mak PDHJ halibur ona dadus, karik sei falta informasaun ruma mak seidauk kompleta husu informasaun adisional hodi kompleta. No mos husu ba partisipantes sira atu fó sira ninia sujestoens kona-ba rezultadu analiza, konkluzaun no rekomendasaun maka PDHJ dezenvolve ona liu husi materia aprezentasaun rezultadu monitorizasaun nian.

Iha sesaun aprezentasaun, Ofisial Fiskalizador, Bartolomeu Gonçalves no Ofisial Fiskalizadora, Maria de Jesus, aprezenta esbosu rezultadu monitorizasaun ba programa merenda eskolar ne’ebé halo iha Munisipius sira ne’ebé sai hanesan alvu monitorizasaun nian.

Atividade enkontru públiku ne’e, realiza iha sala enkontru Ministériu Edukasaun Munisipiu Dili, ne’ebé hetan partisipantes husi Diretor Eskolar, Coordenador Eskolar no Inspetur Eskolar, GAT, Profesores no Superintendente iha Munisipiu Dili.

Notisia seluk

Provedór Husu Governu Atua Preukupasaun Públiku Kona-ba Problema Saúde

Dili, 16 Jullu 2024 - Provedór ba Direitus Umanus no Justisa, Virgílio da Silva Guterres ‘Lamukan’, husu ho urjénsia ba Ministra Saúde ho nia...

PDHJ Timor-Leste Organiza Enkontru Grupu Traballu Tékniku SEANF Daruak Kona-ba Direitus Umanus

Husi loron 10-11 fulan jullu tinan 2024, Provedoria Direitus Umanus no Justisa (PDHJ) Timor-Leste sai uma nain ba Enkontru Grupu Traballu Tékniku Daruak Fórum...

PDHJ Apela Promove Sosiedade Inkluzivu iha Komemorasaun Loron Nasionál Ema ho Defisiénsia

Dili, 4 jullu 2024 – Provedóra-Adjunta Direitus Umanus, Maria Marilia da Costa, apela ba entidade hotu-hotu atu promove sosiedade Timor-Leste ida ne’ebé inkluzivu liu...

Provedóra-Adjunta Direitus Umanus, Partisipa iha Enkontru ba Estabelesimentu Inter-NHRI Inquiry Mechanism

Quezon, Filipina, 26-27 juñu 2024 – Provedóra-Adjunta ba área Direitus Umanus Maria Marilia da Costa ho Ofisiál Investigasaun Valerio Magno Ximenes, partisipa iha enkontru...