Díli, 15 abril 2026 – Ekipa Kuadrilaterál ne’ebé kompostu hosi Provedoria dos Direitos Humanos e Justiça (PDHJ), Comissão Anti-Corrupção (CAC), Comissão da Função Pública (CFP), no Inspeção-Geral do Estado (IGE) fó formasaun durante loron tolu ba diretór no xefe departamentu sira Ministériu Komérsiu no Indústria (MCI), foka liu ba “Prevene no Kombate Korrupsaun hodi Promove Governasaun Di’ak no Proteje Direitus Umanus iha Administrasaun Públika.”
Iha abertura ba formasaun ne’e, Provedór-Adjuntu ba Boa Governasaun, Rigoberto Monteiro, subliña katak inisiativa ne’e ho objetivu atu hametin komprensaun kona-ba prinsípiu governasaun di’ak no sira-nia papél hodi salvaguarda direitus umanus iha instituisaun públika nia laran. Nia salienta katak prestasaun atendimentu públiku ne’ebé efetivu presiza integridade, responsabilizasaun, no aplikasaun prátika hosi prinsípiu sira-ne’e hodi prevene no kombate korrupsaun. “Treinamentu ne’e la’ós kona-ba hanorin malu, maibé kona-ba fahe perspetiva kona-ba oinsá atu promove governasaun di’ak tanba bainhira governasaun ne’e forte, korrupsaun sei dook,” nia nota.
Vise-Ministru MCI, Augusto Júnior Trindade, fó benvindu ba inisiativa ne’e no louva kolaborasaun forte entre instituisaun haat ne’e. Nia destaka importánsia atu ekipa lideransa no pesoál tékniku sira ho koñesimentu atualizadu kona-ba regra no prosedimentu sira hodi garante implementasaun loloos iha operasaun loroloron nian. Nia enkoraja partisipasaun ativu, hodi nota katak maski iha tempu badak nia laran, formasaun oferese hanoin sira ne’ebé iha valór atu hadi’a foti desizaun no supervizaun, partikularmente iha área sira hanesan aprovizionamentu no jestaun finanseira.
Kontribui mós ba sesaun ne’e, Komisáriu CAC Rui Pereira dos Santos subliña importánsia atu kumpre obrigasaun legál sira, inklui ezijénsia deklarasaun patrimóniu ba funsionáriu públiku sira. Formasaun ne’ebé hala’o iha loron 13 to’o 17 abril 2026 iha MCI nia instalasaun sira Fomento nian iha Díli, halo parte iha esforsu sira ne’ebé la’o hela atu reforsa integridade, transparénsia, no responsabilizasaun iha administrasaun públika tomak.
This post is also available in: English