Oé-Cusse, 13 abril 2026 – Diretór Delegasaun Territoriál PDHJ iha Oé-Cusse, Bartolomeu Gonçalves, hamutuk ho ekipa, hala’o vizita traballu no enkontru koordenasaun ho Diretór Rejionál Edukasaun no Solidariedade Sosiál, Vincêncio Cono iha nia eskritóriu iha Santa Rosa. Enkontru ne’e ho objetivu atu avalia medida sira ne’ebé foti hosi autoridade sira kona-ba projetu infraestrutura sira ne’ebé implementa entre 2023 no 2025 uza fundu Estadu nian, partikularmente sira ne’ebé abandona hosi kontratór sira ka kompleta ona maibé la uza ba atividade ensinu aprendizajen.
Durante enkontru, ekipa PDHJ aprezenta deskobrimentu sira hosi nia monitorizasaun iha terrenu, hodi subliña preokupasaun sira kona-ba patrimóniu públiku oioin ne’ebé seidauk utiliza ho efetivu maski iha investimentu Estadu nian ne’ebé signifikativu. PDHJ subliña nesesidade ba jestaun responsável ba rekursu públiku sira no husu ba autoridade relevante sira atu foti medida konkreta no oportunu hodi garante katak infraestrutura sira hanesan ne’e serve ninia objetivu ne’ebé previstu ba benefísiu estudante no komunidade sira.
Diretór Rejionál Edukasaun no Solidariedade Sosiál, simu ho laran-haksolok dadus ne’ebé PDHJ aprezenta no rekoñese katak informasaun ne’ebé hanesan identifika tiha ona internalmente. Nia nota katak esforsu koordenasaun la’o hela ho entidade relevante sira, inklui Diresaun Rejionál Infraestrutura, Diresaun Rejionál Saúde, no fiskalizadór eskolár sira, atu hetan solusaun ne’ebé apropriadu.
Diretór Rejionál ne’e esplika liután katak edifísiu eskola balun, partikularmente sira ne’ebé lokaliza dook hosi komunidade sira, seidauk uza tanba asesibilidade limitadu ba estudante sira. Nu’udar medida interinu, fasilidade sira-ne’e balun atribui fali ona ba setór saúde hodi uza hanesan postu saúde komunitáriu, ho objetivu atu hadi’a asesu ba servisu saúde báziku sira. Adisionalmente, iha konsiderasaun atu uza temporariamente edifisiu eskola balun ne’ebé seidauk uza nu’udar akomodasaun ba profesór sira ne’ebé foin rekruta husi área remota sira, atu nune’e bele hamenus sira-nia kustu moris.
PDHJ nota katak enkuantu medida temporáriu sira hanesan ne’e bele responde ba nesesidade imediata, hamosu mós preokupasaun luan liu kona-ba planeamentu inisiál, selesaun fatin, no utilizasaun efetivu infraestrutura públika. PDHJ reitera importánsia hosi avaliasaun nesesidade no prosesu planeamentu ne’ebé loloos hodi prevene inefisiénsia sira no garante katak investimentu públiku fó benefísiu sustentável tuir prinsípiu sira governasaun di’ak nian.
Diretór Rejionál mós hato’o apresiasaun ba PDHJ nia intervensaun iha kazu ne’ebé envolve estudante na’in rua ne’ebé la hetan autorizasaun husi sira-nia eskola atu tuir ezame primeiru trimestre iha Eskola Bázika Sentrál Baoknana. Nia garante katak nia eskritóriu sei halo akompañamentu ba asuntu ne’e hodi verifika faktu sira no koordena ho superintendente eskola no inspetór sira hodi asegura foti asaun ne’ebé apropriadu.
This post is also available in: English