Quezon, Filipina, 26-27 juñu 2024 – Provedóra-Adjunta ba área Direitus Umanus Maria Marilia da Costa ho Ofisiál Investigasaun Valerio Magno Ximenes, partisipa iha enkontru ba dezenvolvimentu Mekanizmu Inkéritu ba Asuntu Direitus Umanus Transfronteirisu Entre-Instituisaun Nasionál Direitus Umanus (NHRI), (INIM, sigla Ingléz) iha Quezon, Filipina.
Sorumutu ne’ebé konklui iha loron 27 fulan juñu tinan 2024, marka faze daruak estabelesimentu INIM nian. Ida-ne’e foka ba identifikasaun kestaun transfronteira sira ne’ebé urjente iha rejiaun Ázia-Pasífiku, avalia efikásia hosi mekanizmu protesaun sira ne’ebé eziste, no halibur sujestaun sira ba inkéritu konjunta sira. Adisionalmente, enkontru ne’e rezulta iha formasaun Grupu Traballu Tékniku (TWG).
Iha sorumutu ne’e nia rohan membru sira NHRI ne’ebé partisipa husi Provedoria Direitus Umanus no Justisa (PDHJ), Timor-Leste, Komnas HAM Indonézia, SUHAKAM Malázia, no CHRP Filipina asina Deklarasaun hodi afirma apoiu inequívoku ba estabelesimentu INIM ne’ebé dedika ba haree ba violasaun no abuzu direitus umanus ne’ebé iha dimensaun transfronteirisu. Mekanizmu ida-ne’e sei sai hanesan pontu krítiku ida iha esforsu rejionál atu tane aas dignidade umana, garante responsabilidade no promove justisa.
Ho sorumutu ne’e ekipa kompleta ona faze daru’ak iha dezenvolvimentu INIM, no kontinua ba faze datoluk, ne’ebé involve konvoka grupu traballu tékniku ida hodi hakerek regulamentu inkéritu, protokolu operasionál no memorandu entendimentu. Faze sira tuir mai inklui realiza enkontru nivel aas ida hodi finaliza dokumentu sira ne’e no fó formasaun no apoiu tékniku ba sekretariadu.
This post is also available in: English