Ave Caicoli, Dili, Timor-Leste

info@pdhj.tl

  • tp
  • en

Provedor Preukupa ho StockOut Aimoruk iha HNGV

𝘿𝙞́𝙡𝙞, 05 𝙟𝙪𝙣̃𝙪 2024- Haktuir ba mandatu Provedór Direitus Umanus no Justisa ni’an hodi halo supervizaun ba entidade públika sira maka iha Tersa, (4 juñu 2024) Provedór Virgílio da Silva Guterres ‘Lamukan’ hamutuk ho tékniku sira halo monitorizasaun ba Ospitál Nacional Guido Valadares (HNGV) hodi observa no enkontru ho responsável másimu sira iha HNGV relasiona ho asuntu stock-out ai-moruk ne’ebé difikulta atendementu saúde pasiente sira ni’an.

Husi enkontru ho Diretóra Ezekutivu en-ezersísiu Sarah Maria Filomena Xavier, konfirma katak iha stock-out ai-moruk iha HNGV, reajente 13% no konsumaveis ni’an iha 11%. Alende ne’e iha mós preukupasaun konaba sobrekarga (overload) iha sala baixa ni’an rejulta pasiente balun ténke toba de’it iha korredór. Tanba ne’e provedór husu atu guvernu halo esforsu atu bele stabiliza fila-fali situasaun ne’e.

“Ami bele dehan kuandu ai-moruk falta to’o 11% ne’e situasaun preukupante, tanba ospitál nasionál ida labele falta ai-moruk. Entaun ida ne’e preukupasaun ne’ebé halo ami to’o iha ne’e no koa’lia ho pesoál sira ne’ebé ké responsável liuliu iha parte polítika ninian atu halo intervensaun imediata oinsá atu estabiliza situasaun ne’e.” Provedór hateten.
Liga ba asuntu stock-out no prestasaun servisu saúde ni’an en-jerál maka, iha fulan kotuk Provedór forma ona ekipa konjunta ida hodi halo avegurasaun. Objetivu maka atu halibur informasaun ida detallu liu hodi bele hato’o rekomendasaun nesesáriu ba parte relevante sira.

Parte husi prosesu avegurasaun ne’e maka iha tempu badak Provedór sei vizita no halo enkontru ho responsável Institutu Nasionál Farmasia no Produtus Médikus (INFPM) hodi bele hetan informasaun adisionál sira kona-ba asuntu stock-out. Lamukan hatutan katak bainhira nesesáriu sei halo konvokatóriu ba entidade polítika hanesan Ministra Saúde no Vise-Ministru Sira hodi presta klarifikasaun iha nível polítika ni’an.
Provedór Direitus Umanus no Justisa nia intervensaun ne’e atu asegura katak estadu garante povu nia direitu ba saúde no asisténsia médika, sanitária no iha dever atu defende, promove saúde povu ni’an hanesan haktuir iha artigu 57 Konsituisaun RDTL.

This post is also available in: English

Notisia seluk

Estadus Unidus no Timor-Leste Halo Parseiria hodi Lansa Inisiativa Xave Anti-Korrupsaun

Komunikadu Imprensa                                            ...

Provedór Guterres Partisipa iha Fórum ASEAN Dahuluk Nian Kona-ba Liberdade ba Reuniaun Pasífika

Provedór Virgílio da Silva Guterres ‘Lamukan’ partisipa iha Fórum ASEAN kona-ba Liberdade Reuniaun Pasífika, ne’ebé hala’o iha loron 15-16 fulan-jullu tinan 2024, iha Banten,...

Provedór Husu Governu Atua Preukupasaun Públiku Kona-ba Problema Saúde

Dili, 16 Jullu 2024 - Provedór ba Direitus Umanus no Justisa, Virgílio da Silva Guterres ‘Lamukan’, husu ho urjénsia ba Ministra Saúde ho nia...

PDHJ Timor-Leste Organiza Enkontru Grupu Traballu Tékniku SEANF Daruak Kona-ba Direitus Umanus

Husi loron 10-11 fulan jullu tinan 2024, Provedoria Direitus Umanus no Justisa (PDHJ) Timor-Leste sai uma nain ba Enkontru Grupu Traballu Tékniku Daruak Fórum...