Dili – Iha loron 25 Janeiro 2016, Provedor Dr. Silverio Pinto Baptista akompanha husi Adjunto Provedor ba area Direitus Humanus Dr. Horacio de Almeida no Adjunta Provedor ba area Boa Governasaun Dra. Jesuina M. F. Gomes, MPA hasoru malu ho Procurador Geral Republika Dr. Jose da Costa Ximenes hodi hametin koperasaun servisu entre Instituisaun rua ne’e ba futuru.
Provedor hateten katak, kna’ar husi Instituisaun Provedoria dos Direitos Humanos e Justiça (PDHJ) mak simu keixa husi sidadaun hotu no halo investigasaun depois rezultadu investigasaun haruka ba Ministério Públiku hodi halo prosesa tuir prosedimentu criminal nian. Tanba tuir Konstituisaun RDTL no Kodigu Prosesu Penal atu halo akuzasaun so Ministério Públika mak iha kompetensia atu halo akuzasaun. Provedor rekoñese katak dala ruma PDHJ hasoru difikuldades halo investigasaun ba keixa balun, tanba tempu investigasaun liu no dala ruma Ministeriu Públiku arkiva de’it liu-liu ba kazu semi públiku.
Provedor hatutan, ami marka audensia ho Procurador Geral Republika atu halo kerdenasaun servisu, atu nune’e Procurador bele orienta ba nia Procurador Distrital sira atu kontinua halo kolaborasaun ho Instituisaun PDHJ, liu-liu ba investigador sira no mos pesoal sira ne’ebé servisu iha area hare tuir rekomendasaun, atu nune’e iha futuru iha keixa balun ne’ebé mak ami simu no ami hare katak keixa ne’e kategoria ba kazu semi públiku PDHJ la presiza halo investigasaun final hodi haruka ba Ministeriu Públiku maibe wainhira PDHJ simu keixa ne’e hodi refere ka reprezentante vitima, ofisias PDHJ bele akompaña diretamente vitima no sasin haruka ba Ministeriu Públiku hodi prosesa tuir Kodigu Prosesu Penal. Atu nune’e PDHJ ho Ministeriu Públiku bele asegura nafatin direitu vitima nian hodi hetan justisa ne’ebé justu no lais.
Provedor dehan liu tan, bainhira kazu semi públiku PDHJ sei halo lalais akompañamentu ba vitima hodi hato’o rekomendasaun ba Ministeriu Públiku. Kona-ba sansaun administrativa PDHJ sei halo rekomendasaun ba Instituisaun relevantes hodi halo prosesu tuir kompetensia.