Dili, 13 jullu 2026 – Provedór Direitus Umanus no Justisa, Virgílio da Silva Guterres “Lamukan”, akompaña husi Provedór- Adjuntu Governasaun Di’ak, Rigoberto Monteiro, Provedóra-Adjunta Direitus Umanus, Maria Marília da Costa, membru Jestaun Ezekutivu no Diretór sira formalmente, aprezenta Relatóriu Anuál 2025 Provedoria Direitus Umanus no Justisa (PDHJ) nian ba Parlamentu Nasionál.
Relatóriu Anuál 2025 fornese vizaun jerál komprensivu ida kona-ba PDHJ nia serbisu iha implementasaun mandatu konstitusionál durante tinan tomak. Relatóriu ne’e subliña instituisaun ne’e nia intervensaun sira hodi proteje no promove direitus umanus, hametin governasaun di’ak, trata keixa públika sira, hala’o investigasaun, monitoriza fatin detensaun sira, prizaun, ospitál no instituisaun sosiál sira, promove edukasaun sívika, no haree filafali polítika públika sira hodi garante kumprimentu ba Konstituisaun no padraun direitus umanus nian.
Entre realizasaun xave sira iha tinan 2025, PDHJ rejista keixa 179, prosesa kazu investigasaun 217, kompleta investigasaun 194, monitoriza fasilidade saúde 34 iha munisípiu hotu-hotu inklui RAEOA, no hala’o inspesaun regular ba sentru detensaun, prizaun, no instituisaun solidariedade sosiál. PDHJ ne’e mós kontinua programa edukasaun no sensibilizasaun direitus umanus iha teritóriu tomak, hodi alkansa sidadaun rihun ba rihun liuhosi formasaun, divulgasaun komunidade, no kampaña informasaun públika.
Iha aprezentasaun relatóriu, Provedór Virgílio da Silva Guterres reafirma kompromisu PDHJ nian atu hametin estadu direitu, proteje direitus umanus, promove governasaun ne’ebé responsabiliza no transparente, no garante katak sidadaun ida-idak iha asesu ba justisa. Nia mós hato’o apresiasaun ba Parlamentu Nasionál, instituisaun estadu, parseiru dezenvolvimentu, organizasaun sosiedade sivíl, mídia, no públiku ba sira-nia kooperasaun kontinua hodi avansa direitus umanus no governasaun di’ak iha Timor-Leste.
Ba relatóriu kompletu asesu iha ne’e: https://www.pdhj.tl/wp-content/uploads/2026/07/Relatoriu-Anual-PDHJ-2025.pdf
Ba rezumu relatóriu asesu iha ne’e: https://www.pdhj.tl/wp-content/uploads/2026/07/Rezumu_Relatoriu-Anual-PDHJ-2025.pdf
This post is also available in: English