Dili, 16 outubru 2026 –Provedór-Adjuntu ba Boa Governasaun, Rigoberto Monteiro, partisipa iha diskusaun meza redonda hodi komemora Loron Nasionál Liberdade Imprensa ba dala haat, ne’ebé hala’o iha Sentru Konvensaun Dili ho tema “Mídia Livre, Demokrasia Metin”. Organiza husi Asosiasaun Rádiu Komunidade Timor-Leste (ARKTL), eventu ne’e foka ba prepara mekanizmu protesaun ba jornalista sira molok, durante no hafoin Eleisaun Prezidensiál 2027 hodi prevene no rezolve intimidasaun, ameasa no risku sira seluk ne’ebé jornalista sira bele hasoru bainhira halo kobertura ba atividade eleitorál sira iha terenu. Diskusaun ne’e halibur parte interesada relevante sira hodi konsidera medida prátika sira hodi salvaguarda jornalista sira-nia seguransa, asesu no abilidade atu halo relatóriu independentemente durante prosesu eleitorál tomak. Iha nia diskursu, Provedór-Adjuntu kongratula jornalista sira kona-ba Loron Nasionál Liberdade Imprensa, subliña katak liberdade imprensa hetan liuhosi sakrifísiu povu nian no hetan rekoñesimentu iha Konstituisaun Timor-Leste. Nia mós fó hanoin ba partisipante sira katak liberdade mai ho limitasaun no responsabilidade, subliña katak liberdade imprensa tenke ezerse ho respeitu ba ema seluk nia direitu no liberdade.
Iha diskusaun Provedór-Adjuntu aprezenta rekomendasaun xave rua. Primeiru, nia husu atu dezenvolve protokolu ida ba protesaun jornalista sira durante eleisaun, kobre akreditasaun, seguransa no asesu ba atividade sira ne’ebé relasiona ho antes, durante no hafoin prosesu eleitorál, ho objetivu atu prevene intimidasaun no ameasa hasoru jornalista sira bainhira halo reportajen iha terenu. Segundu, nia destaka importánsia atu halo advokasia ba remunerasaun ne’ebé justu no apropriadu ba jornalista sira, partikularmente sira ne’ebé serbisu iha organizasaun mídia privadu sira. Nia subliña katak diskusaun sira kona-ba lejislasaun saláriu mínimu nian tenke konsidera natureza espesífiku no ezijénsia sira jornalizmu nian, hodi garante katak remunerasaun reflete jornalista sira-nia responsabilidade, karga serbisu no kontribuisaun profisionál sira. Rekomendasaun sira-ne’e hakarak hametin jornalista sira-nia seguransa, kondisaun profisionál no independénsia, enkuantu rekoñese knaar esensiál hosi mídia ida ne’ebé livre no responsável hodi promove transparénsia, responsabilizasaun no governasaun demokrátika iha Timor-Leste.
This post is also available in: English