RAEOA, 23 setembru 2025 – Provedoria dos Direitos Humanos e Justiça (PDHJ), liu husi Delegasaun Territorial iha RAEOA, halo monitorizasaun ba programa pagamentu subsídiu governu nian ba idozu no ema ho defisiénsia iha Suku Beneufe, Postu Administrativu Nitibe, Oé-Cusse. Benefisiáriu hamutuk 256 mak simu pagamentu hus’ Institutu Nasionál Seguransa Sosiál (INSS). Monitorizasaun ne’e halo parte iha mandatu konstitusionál PDHJ nian atu garante katak programa governu nian implementa tuir prinsípiu direitus umanus no governasaun di’ak. PDHJ observa katak enkuantu prosesu pagamentu ne’e organiza ho di’ak, ferik-katuas barak nafatin hasoru difikuldade tanba la’o dook no asesu estrada ne’ebé limitadu atu to’o iha fatin pagamentu.
PDHJ fó benvindu ba esforsu eskritóriu rejionál INSS nian, ne’ebé halo koordenasaun ho instituisaun estadu sira seluk no Banku Nasionál Komérsiu Timor-Leste hodi presta servisu liuhosi ekipa integradu. Aleinde pagamentu subsídiu, ekipa fornese servisu esensiál sira hanesan rejistu sivíl, administrasaun eleitorál, edukasaun, no konsulta saúde. Servisu sira-ne’e ajuda benefisiáriu sira, liuliu sira ne’ebé mai hosi área remota sira, atu hetan informasaun, atualiza dokumentu sira, no asesu ba kuidadu saúde báziku. PDHJ subliña katak aprosimasaun integradu ida-ne’e hanesan pasu importante ida hodi promove inkluzividade no garante katak komunidade sira iha área remota sira la husik hela iha kotuk.
Liuhusi nia envolvimentu ho autoridade lokál sira no fornesedór servisu sira, PDHJ mós enkoraja koordenasaun ne ebé forte liután atu rezolve lakuna iha dokumentasaun no hadi’a asesu ba grupu vulneravel sira. Komunidade sira hato’o apresiasaun ba inisiativa ne’e, hodi nota katak sira la’ós de’it simu sira-nia subsídiu maibé mós hetan benefísiu husi kontrolu saúde, distribuisaun ai-moruk, no informasaun vital kona-ba sira-nia direitu no devér nu’udar sidadaun. PDHJ reafirma nia kompromisu atu kontinua halo monitorizasaun ba programa sira hanesan ne’e hodi salvaguarda benefisiáriu sira nia direitu no atu garante servisu governu nian hala’o ho justu, transparente, no tuir prinsípiu governasaun di’ak.
This post is also available in: English