Dili : Iha loron 21 fulan Fevereiru 2017, Provedor interino aktual Adjuntu Provedor ba area Direitos Humanos Dr. Horacio de Almeida konvoka enkontru daruak entre linhas Ministérial hodi tur hamutuk buka solusaun kona-ba lamentasaun vendedores ambulante sira nian ba atuasaun Guarda Operasional Mercadoria Munisipal Dili no PNTL sira hasoru Vendedores Ambulante sira iha Largu Lecidere Dili, iha loron 14 Dezembru 2016.
Enkontru ne’e rasik realija iha sala Biblioteka PDHJ durante oras ida nia laran ne’ebé mak partisipa husi, reprejentante Ministério Administrasaun Estatal (MAE), Prezidente Autoridade Munisipal Dili, Ministério do Turismu, Ministério Komersiu Industria no Ambiente (MCIA) inklui SERVE.
Iha abertura ba enkontru ne’e, Provedor Interino aktul haktuir katak, reuniaun ne’ebé realija ho linha Ministerial sira hanesan reuniaun ba daruak ne’ebé PDHJ realija atu buka solusaun hodi responde ba preokupasaun vendedores ambulante sira nian.
Tanba PDHJ hanesan mediador deit ba iha estadu no povu atu ajuda fasilita grupu rua buka solusaun ne’ebé diak ba problema ida.
Hatan ba kestaun sira ne’e, Sekretariu Estadu Administrasaun Estatal, Samuel Mendonça haktuir katak, sira mos louva ho hanoin diak husi PDHJ nian ne’ebé konsege akumula ona linha Ministerial sira tur hamutuk hodi buka solusaun ba problema negosiante ambulante ne’ebé agora dadaun sai preokupasaun iha públiku.
Nia dehan governu seidauk iha hanoin atu taka prosesu fa’an no sosa komunidade sira produtu maibe, governu so regula deit bazeia ba lei orden higiene publika ne’ebé iha.
Maibe nia mos apela ba iha Prezidente Autoridad Munisipiu Dili atu fo oportunidade ba vendedores nain 10 hodi fa’an sasan ho modelu hanesan cathering nian iha parte Largo Lecidere nian maibe, tenki depois de oras serbisu hanesan tuku 5 loraik ba leten no tenki ho kondisaun ne’ebé mos no labele hafoer rai.
Entertantu tuir Diretor Comercio Interno Ministeriu Komersiu Industria no Ambiente (MCIA) Sr. Nelito Lima de Araújo haktuir katak, MCIA antes ne’e prepara tiha ona fatin rua ba vendedores sira atu fa’an sasan no fatin rua ne’e mak hanesan merkadu Taibesi no Manleuana maibe ba futuru MCIA hamutuk ho SERVE mos iha ona planu atu reativa fali merkadu Bekora para fasilita vendedores sira husi parte ne’eba.
Maibe fila fali ba sira ne’ebé mak leba no dudu gerobak hodi fa’an modo tama sai iha sidade Dili maioria sira ne’e mai husi negosiante iha merkadu Taibesi no Manleuana ne’e abandona tiha sira nia fatin hodi mai fan fali iha Dili laran.
Aliende ne’e, Diretor SERVE, Sr. Florencio Sanches mos haktuir katak, SERVE prontu atu fo apoiu orsamentu ba Autoridade Munisipiu Dili hodi halao sosialijasaun ba públiku liu husi avizu iha Bilboard no pamfletu kona-ba lei higiene orden publika no fatin-fatin importante ne’ebé mak bele fa’an no labele fa’an.
Entertantu Adjunta PDHJ Dra. Jezuinha M. F. Gomes, mos sujere atu labele halo deit sosialijasaun liu husi Bilboard no pamfletu maibe, presija halao mos sosialijasaun direitamente ba vendedores sira iha merkadu Manleuana no Taibesi tanba susar se bainhira avizu liu husi Bilboard no Pamfletu deit tanba iha maluk vendedores balun ne’ebé lê la hatene.
Adjunta mos haktuir katak PDHJ iha Departementu Promosaun nian ne’ebé prontu atu kopera hamutuk hodi fo apoiu sosialijasaun lei orden Higiene hamutuk ho Guarda Munisipal Dili ba iha negosiante ambulante sira.
Tuir planu enkontru ne’e sei realija tan dala ida entre linha Ministerial ho vendedores ambulnte sira atu hetan solusaun ikus.