Ermera, 11 juñu 2025 – Provedór Direitus Umanus no Justisa, Virgílio da Silva Guterres “Lamukan”, no Prezidente Autoridade Munisípiu Ermera, José Martinho dos Santos Soares, ofisialmente loke programa formasaun ba funsionáriu públika ne’ebé ho objetivu atu hametin governasaun di’ak no kombate korrupsaun iha ámbitu administrasaun públika Munisípiu Ermera, hodi kontribui ba esforsu luan liután iha Timor-Leste.
Treinamentu ne’ebé hala’o iha Salaun Administrasaun Gleno ne’e ho tema “Prevene no Kombate Korrupsaun hodi Promove Boa Governasaun no Proteje Servisu Públiku iha Timor-Leste.” Inisiativa ne’e halo parte iha Parseria Kuadrilaterál no hetan apoiu hosi UNDP iha ámbitu Projetu Parseria Tripartida (TPP).
Programa ne’e ho objetivu atu reforsa kooperasaun institusionál no fó ba funsionáriu públiku sira iha Ermera koñesimentu no abilidade ne’ebé presiza atu promove no proteje direitus umanus, prevene korrupsaun, komprende devér no direitu funsionáriu públiku sira-nian, no kontrola no prevene irregularidade no mal-administrasaun iha administrasaun públika.
“Estadu estabelese órgaun fiskalizasaun hanesan Provedoria Direitus Umanus no Justisa (PDHJ), Komisaun Anti Korrupsaun (CAC), Komisaun Funsaun Públika (CFP), no Inspesaun Jerál Estadu (IGE) atu asegura katak administrasaun públika serve ba interese públiku,” dehan Provedór Guteres.
Nia husu ba diretór no ofisiál superiór sira atu lidera ho justisa no integridade. “Diretór sira no sira ne’ebé iha pozisaun xefia tenke fiskaliza ho rigorozu ba sira-nia pesoál, maibé atua nafatin ho justu. Ita labele foti desizaun bazeia ba interese pesoál ka relasaun ne’ebé rezulta tratamentu la justu ba funsionáriu sira,” nia subliña.
Provedor nota katak keixa sira dalabarak tama kona-ba desizaun dixiplinár ne’ebé la bazeia ba investigasaun loloos. “Iha ona kazu sira ne’ebé maka funsionáriu sira ne’ebé hetan suspensaun hosi CFP hetan vindikasaun hosi tribunál sira, ho sira nia direitu nu’udar funsionáriu públiku ne’ebé hetan restaurasaun,” nia hatutan.
Iha nia diskursu, Prezidente Autoridade Munisipál Ermera José Martinho dos Santos Soares enkoraja diretór no funsionáriu superiór sira atu partisipa ativu iha formasaun refere. Nia subliña importánsia atu promove governasaun di’ak no proteje direitus umanus iha servisu fatin.
This post is also available in: English