Oé-Cusse, 09 abril 2026 – Provedoria Direitus Umanus no Justisa (PDHJ) nia Delegasaun Teritorriál Oé-Cusse, ne’ebé lidera husi Diretór Delegasaun Bartolomeu Gonçalves ho nia ekipa, hala’o monitorizasaun ba Eskola Bázika Sentrál Baoknana iha Suku Bene Ufe, Postu Administrativu Nítibe, Rejiaun Oé-Cusse.
Vizita ne’e ho objetivu atu verifika relatóriu sira katak eskola impede estudante mane na’in-rua, ne’ebé identifika ho sira nia inisiál A.S. no M.R., atu labele tuir ezame períodu dahuluk nian durante loron rua (Tersa no Kuarta). Tuir eskola, estudante sira hetan bandu tanba sira seidauk selu multa tanba falta beibeik lahó justifikasaun. Bazeia ba regulamentu ne’ebé estabelese hosi eskola iha kolaborasaun ho inan-aman sira iha loron 10 fulan-agostu tinan 2024, estudante sira tenke selu $1.00 kada loron ba auzénsia sira ne’ebé la justifikadu.
Observasaun sira iha kampu hatudu katak, tuir insidente, estudante na’in-rua ne’e ikusmai hetan lisensa atu tuir sira nia ezame iha loron datoluk hamutuk ho sira nia kolega sira. Ida ne’e akontese hafoin estudante sira nia inan-aman selu multa hamutuk $16 iha Eskola Bázika Sentrál Baoknana iha loron 9 fulan Abril.
Ekipa PDHJ halo intervensaun hodi ko’alia ho ofisiál eskola nian, hodi hato’o ba sira atu hadook-an husi prátika sira ne’ebé viola direitus umanus. Ekipa enkoraja profesór sira atu halo revizaun ba regra sira ne’ebé estabelese hamutuk entre eskola no inan-aman sira hodi asegura katak prosesu ezame estudante sira nian la hetan obstákulu ka prejuizu.
Nu’udar resposta, Diretór Adjuntu EBC nian, ne’ebé identifika ho inisiál J.C., rekoñese katak eskola maka sala tanba la permite estudante na’in-rua tuir sira nia ezame. Nia kompromete atu orienta profesór sira hodi jere di’ak liután sira-nia tempu atu nune’e estudante na’in-rua ne’e bele tuir sira-nia ezame iha loron hirak tuirmai hafoin períodu ezame atuál konklui.
Delegasaun Territoriál PDHJ RAEOA nian mós sei komunika ho Diretór Edukasaun Rejionál hodi relata situasaun, hodi garante katak fó sai instrusaun loloos ne’ebé aliña ho polítika edukasaun rejionál.
This post is also available in: English