Dili- Iha loron 13 Jullu 2016, Provedoria dos Direitos Humanos e Justiça (PDHJ) Diresaun Governasaun Di’ak no Diresaun Direitus Umanus, Departamentu Monitorizasaun no Prevensaun halo enkontru públiku kona-ba “ Rezultadu Monitorizasaun Programa Merenda Eskolar Iha Timor-Leste”. Munisipiu ne’ebé sai hanesan alvu monitorizasaun husi ekipa Provedoria mak hanesan Munisipiu Dili, Ermera, Ainaro, Viqueque no Rejiaun Administrativa Espesial Oe-cusse Ambeno (RAEOA).
Adjunta Provedor ba área Governasaun Di’ak, Dra. Jesuina M. F. Gomes, MPA iha abertura hateten ba partisipantes sira katak, objetivu husi sesaun enkontru públiku ne’e hanesan parte ida atu rekolha tan pontus-pontus informasaun adisional balun molok atu públika relatoriu ne’e.
Adjunta husu ba partisipantes sira atu fó sira nia opiniaun no komentariu kona-ba programa merenda eskolar ne’ebé mak PDHJ halibur ona dadus, karik sei falta informasaun ruma mak seidauk kompleta husu informasaun adisional hodi kompleta. No mos husu ba partisipantes sira atu fo sira ninia sujestoens kona-ba rezultadu analiza, konkluzaun no rekomendasaun maka PDHJ dezenvolve ona liu husi materia aprezentasaun rezultadu monitoring nian.
Iha oportunidade ne’e, Adjunta esplika ba partisipantes sira katak, Provedoria establese iha Konstituisaun RDTL artigu 27 ne’ebé hateten katak, Provedoria hanesan instituisaun independenti ida ne’ebé nia papel atu rona komunidade sira nia halerik no keixa kona-ba lalaok governo nian.
Adjunta hatutan tan, Provedoria iha ninia kompetensia 3 hanesan halo investigasaun, promosaun no edukasaun no monitorizasaun no rekomendasaun. Atividade enkontru públiku ne’ebé realiza ne’e, tama iha kompetensia monitorizasaun nian, tanba monitorizasaun ne’e halo ba isu tematiku sira hanesan merenda eskolar no halo mos monitorizasaun ba projetu governo nian inklui mos projetu ne’ebé halo hela iha Munisipius sira. Provedoria nia monitorizasaun ne’ebé halo nia objetivu atu ajuda instituisaun governo nian atu hadia sira nia sistema no prosidementus, tanba programa merenda eskolar ne’e isu nasional.
Iha fatin hanesan, Diretor Edukasaun Munisipiu Ermera, Carlos Salsinha husu mos ba partisipantes sira atu tuir enkontru ne’e ho seriedade, tanba wainhira PDHJ públika ona relatoriu ne’e, la iha tan informasaun adisional ona.
“Tanba saida mak PDHJ tenki marka prezensa iha Ministériu Edukasaun kona-ba programa merenda eskolar, tanba problema merenda eskolar ne’e kompleksu teb-tebes, ho nune’e ita (Edukasaun Red) persiza duni PDHJ no Tribunal de Kontas atu nune’e kontrola osan ne’ebé governo fó ba programa merenda eskolar nian, ho nune’e uza ho responsabilidade tuir padraun ne’ebé iha”, dehan Diretur.
Iha sesaun aprezentasaun, Xefi Departamentu Monitorizasaun no Prevensaun, Bartolomeu Gonçalves no Ofisial Monitorizasaun Direitus Umanus, Maria de Jesus, aprezenta rezultadu monitorizasaun ba programa merenda eskolar ne’ebé halo iha Munisipius sira ne’ebé sai hanesan alvu monitorizasaun nian.
Entretantu iha seremonia enseramentu ba enkontru ne’e, Adjunta Provedor hato’o agradesimentu ba partisipantes sira ne’ebé fó sira nia informasaun adisional. Nomos hamenu hela ba partisipantes katak sira nia informasaun hotu sei halo reanaliza hodi bele reforsa liu tan iha parte rekomendasaun mak PDHJ dezenvolve ona iha relatoriu monitorizasaun ninian, antes atu publika ba publiku no rekomenda ba Ministeriu kompetente atu bele hola responsabilidade para hadiak.
Atividade enkontru públiku ne’e, realiza iha sala enkontru Ministériu Edukasaun Munisipiu Ermera, ne’ebé hetan partisipantes husi Diretor Eskolar, Coordenador Eskolar no Inspetur Eskolar, GAT, Profesores no Superintendente iha Munisipiu Ermera.