Data, 07-08-2007
Provedoria dos Direitos Humanos e Justiça (PDHJ) servisu hamutuk ho Gabinete Asesoria Direitos Humanos ba Primeiru Ministru, sosiadade sivil hanesan Asosiasaun HAK no Fokupers inklui unidade direitos humanos UNMIT nian hala’o treinamentu ba PNTL inklui ba membros PNTL iha Covalima. Treinamentu ne’ebé hala’o durante loron tolu (6-8 Agostu ) kona-ba direitus humanos no lei.
“Provedór Interino Silverio Pinto Baptista hateten katak PNTL hanesan instituisaun ida importante ne’ebé garante ona iha konstituisaun RDTL Artigu 147 hanesan autor ba defende prinsipiu no valores demokrasia, responsavel ba seguransa interna, mantein lei no orde atu protégé direitu fundamental sidadaun ida-idak nian tuir lei ne’ebé vigora iha Timor-Leste”.
“Dr. Silverio hatutan liu husi treinamentu ne’e atu aumenta liu tan kapasidade no kuinesimentu membrus PNTL nian iha parte lei no mos iha parte Direitos Humanos hodi bele ajuda liutan membros polisia sira kuinesimentu bainhira hala’o sira nia knaar no funsaun iha terenu”.
Fasilitator iha treinamentu ne’e mak hanesan Silverio Pinto Baptista Provedór Interino, Aniceto Neves husi Asosiasaun HAK, Nelinho Vital husi Asessoria Direitos Humanos ba Primeiru Ministru, Sabino Baris husi Unidade Direitos Humanos UNMIT, Mize husi Fokupers no reprejentante husi Akademia PNTL.
Iha espetativa ida katak ho aprejentasaun materia sira ne’ebé mak hato’o husi orador sira iha treinamentu ida ne’e, nu’udar bukae ida ba membros polisia sira atu bele implementa iha pratika servisu loro-loron atu bele sai polisia ne’ebé profesional.
Treinu hanesan sei hala’o nafatin iha instituisaun istado nian tomak hanesan F-FDTL, PNTL, funsionariu públiku atu nune’e bele aumenta kuinesimentu kona-ba Direitos Humanos no Lei ba pessoal sira ne’ebé servisu iha aria ne’ebé refere hodi implementa iha sira-nia servisu loro-loron.
Presiza informasaun kontaktu
Lady Ximenes, Informasaun & Relasaun Públika PDHJ HP, 726 1843 ou 333 1071