Dili, 8 setembru 2026 — Provedór Direitus Umanus no Justisa, Virgílio da Silva Guterres “Lamukan” hala’o enkontru ho Programa Dezenvolvimentu Polísia Timor-Leste (TLPDP), ne’ebé reprezenta husi Detetive Sarjentu Daniel Wall ho nia ekipa, hodi ko’alia kona-ba inkorporasaun edukasaun direitus umanus iha rekrutamentu no formasaun ba membru Polísia Nasionál Timor-Leste (PNTL) ne’ebé atu rekruta.
Diskusaun ne’e foka ba identifika konteúdu direitus umanus ne’ebé apropriadu, orientasaun téknika no área kooperasaun potensiál sira hodi garante katak prinsípiu direitus umanus integra iha formasaun ba rekruta polísia foun sira. Inisiativa ne’e partikularmente relevante tanba TLPDP prepara hela programa formasaun ba rekruta PNTL foun maizumenus 700.
Iha enkontru ne’e, Provedór Virgílio da Silva Guterres “Lamukan” destaka importánsia atu ekipa polísia sira ho kompriensaun ne’ebé forte kona-ba direitus umanus dezde inísiu sira-nia kareira. PDHJ iha okaziaun oioin halo advokasia ba inkorporasaun lisaun no formasaun direitus umanus iha preparasaun ofisiál polísia sira ne’ebé foin rekruta, nu’udar parte ida atu hametin polisiamentu ne’ebé profisionál, responsabiliza no bazeia ba direitu.
PDHJ servisu daudaun ona ho PNTL no Unidade Direitus Umanus Nasoins Unidas nian hodi fó formasaun direitus umanus ba pesoál polísia sira. Treinamentu atuál kobre área neen: introdusaun ba direitus umanus; knaar PNTL nian no direitus umanus; padraun direitus umanus kona-ba uza forsa; padraun sira ne’ebé relasiona ho buska, apreensaun no detensaun; protesaun direitus umanus durante krize no estadu emerjénsia konstitusionál sira; no polisiamentu la-diskriminatóriu.
Enkontru ne’e fó oportunidade ba PDHJ no TLPDP atu diskute kona-ba oinsá área hirak ne’e, hamutuk ho prinsípiu direitus umanus sira seluk ne’ebé relevante, bele inkorpora iha formasaun ba rekruta foun sira.
TLPDP fahe esbosu handout ida kona-ba direitus umanus no polisiamentu ho PDHJ hodi halo revizaun no diskusaun liután. Parte rua konkorda atu kontinua sira-nia kooperasaun hodi dezenvolve konteúdu formasaun nian no hametin kapasidade formadór polísia sira-nian, ho objetivu atu garante katak prinsípiu direitus umanus integra ho konsistente iha dezenvolvimentu profisionál pesoál PNTL nian.
Enkontru ne’e hetan partisipasaun mós husi Provedór Guterres, Xefe Gabinete Aureo José António Savio , Diretóra Promosaun Joanita Silvira da Costa no reprezentante husi PDHJ nia Unidade Asesoria Jurídika, Administrasaun no Peskiza, Terencia Nunes hamutuk ho Detetive Sarjentu Daniel Wall no ekipa TLPDP.
This post is also available in: English