Oé-Cusse, 3 Setembru 2026 — Delegasaun Territoriál Provedoria Direitus Umanus no Justisa (PDHJ) iha Rejiaun Administrativa Espesiál Oé-Cusse (RAEOA), ne’ebé lidera husi Diretór Bartolomeu Gonçalves, hala’o sesaun diseminasaun ba estudante sira iha Escola Tékniku Vokasional Lifau, Postu Administrativu Pante Macassar iha 3 setembru 2026. Sesaun ne’e foka liu ba kna’ar no mandatu PDHJ nian, prinsípiu fundamentál sira direitus umanus nian, tráfiku umanu, no prosedimentu sira atu hato’o keixa sira ba PDHJ. Delegasaun ne’e akompaña husi Ofisiál Promosaun Jose Tefa no Ofisiál Administrasaun no Finansas Domingas D. Paixão Quefi.
Sesaun ne’e halibur partisipante na’in 54, inklui estudante no profesór sira, kompostu mane na’in 38 no feto na’in 16. Estudante sira partisipa ho ativu iha sesaun ne’e no hato’o apresiasaun ba oportunidade ne’ebé hetan atu aprende liután kona-ba serbisu PDHJ nian. Liuliu, sira hetan kompriensaun diak liu kona-ba oinsa PDHJ kontribui ba protesaun no promosaun direitus umanus no boa governasaun, oinsa hato’o keixa bainhira sira-nia direitu hetan violasaun ka bainhira sira hetan mal-administrasaun, no mós risku no prevensaun trfiku umanu.
Durante sesaun abertura no enserramentu, Koordenadór ETV Lifau, Adriano Lelan Elo, fó bem-vinda ba delegasaun PDHJ ho apresiasaun, hodi nota katak ida-ne’e nu’udar atividade divulgasaun ba dala uluk ho tipu ne’ebé hala’o iha eskola refere. Nia subliña importánsia atu fornese informasaun ba estudante sira kona-ba instituisaun Estadu nian no sira ida-idak nia responsabilidade, tanba koñesimentu hanesan ne’e bele habelar estudante sira-nia komprensaun no hametin sira-nia abilidade atu envolve ho instituisaun públika sira. Tuir aprezentasaun sira, profesór balun mós enkoraja PDHJ atu kontinua hala’o atividade sensibilizasaun ne’ebé hanesan ba estudante sira.
Atividade divulgasaun ne’e halo parte iha PDHJ nia esforsu ne’ebé kontinua atu lori edukasaun no informasaun direitus umanus besik liután ba komunidade no foin-sa’e sira iha Oé-Cusse. Antes ne’e, iha 31 Aagostu 2026, ekipa PDHJ hala’o sesaun divulgasaun ne’ebé hanesan iha Escola Técnico Vocacional Industrial Católica São João Paulo II, iha Passabe, alkansa partisipante na’in 63, inklui estudante no profesór sira. Partisipante sira kompostu hosi mane na’in 31 no feto na’in 32.
This post is also available in: English