Dili, 24 Outubru 2024 – Provedór-Adjuntu ba Boa Governasaun, Rigoberto Monteiro, hamutuk ho Provedóra-Adjunta ba Direitus Umanus, Maria Marilia da Costa, no funsionáriu superiór sira seluk, aprezenta proposta orsamentu ba Provedór Direitus Umanus no Justisa (PDHJ) ba tinan 2025, no mós ezekusaun Orsamentu 2024, ba Komisaun A Parlamentu Nasionál.
Proposta alokasaun orsamentu ba PDHJ iha tinan 2025 hamutuk $2,139,368.00. Ne’e kompostu husi saláriu no vensimentu hamutuk $1,402,463,00, ne’ebé reprezenta 65,5% husi totál orsamentu. Bens no servisu atuál sira hetan alokasaun $696,905.00, ne’ebé maka halo 32.6%, enkuantu gastu kapitál menór sira maka tau iha $40.000.00, ka 1.9%. Orsamentu ne’e sei finansia programa rua, subprograma hitu, no atividade ruanulu resin ida, ho Programa Direitus Umanus no Boa Governasaun simu $272,155,00, ne’ebé reprezenta 12,7% hosi totál. Orsamentu Operasaun no Jestaun Institusionál hamutuk $1,867,213,00, ka 87,3%.
To’o 23 Outubru 2024, PDHJ nia taxa ezekusaun orsamentu atinji ona 70.8%, ne’ebé hanesan ho valór nominal $1,480,809.00 hosi alokasaun totál $2,061,391.00.
Iha okaziaun ne’e Provedór-Adjuntu Monteiro mos informa ba membru Komisaun A sira kona ba desizaun ne’ebé foti husi Konsellu Administrasaun Fundu Infraestrutura (CAFI) hodi kansela konstrusaun edifisiu foun PDHJ.
Hatan ba ne’e, membru Komisaun A hato’o sira nia intensaun atu husu klarifikasaun husi governu relasiona ho kanselamentu ne’e. “Ami sei husu klarifikasaun husi governu kona-ba kanselamentu edifísiu foun PDHJ nian,” afirma Prezidente Komisaun A, Patrocinio Fernandes. Adisionalmente, deputadu sira hato’o sira-nia esperansa katak PDHJ sei bele ezekuta tomak ninia OJE 2024 iha tempu badak.
Enkontru ne’e hala’o iha Salaun Konferénsia Parlamentu Nasionál, ne’ebé prezide husi Vise Prezidente Komisaun A, Antonio Verdial, no hetan partisipasaun husi Prezidente, Patrocinio Fernandes, hamutuk ho membru parlamentu sira seluk.
This post is also available in: English