Husi loron 12 to’o 16 fulan agostu, Provedoria Direitus Umanus no Justisa (PDHJ), parseria ho Unidade Asesoria Direitus Umanus ONU (UADU) no Sentru Formasaun Polísia (CFP), organiza sesaun formasaun ba ofisiál Polísia Nasionál Timor-Leste na’in 22 ( PNTL)—mane na’in 19 no feto na’in 3—iha munisípiu Covalima. Objetivu mak atu aprofunda sira-nia komprensaun kona-ba direitus umanus.
Iha abertura, Sekretáriu Ezekutivu Ambrosio Graciano Soares salienta katak presija tempu naruk atu muda atitude sira, hodi hateten, “Muda ema nia hanoin no atitude bele lori tinan barak. Mai ita hahú ohin no buka atu hetan progresu signifikativu iha futuru, ho esperansa katak ita-nia servidór estadu sira, liuliu membru PNTL sira, sei tane-aas no respeita lei no orden iha Timor-Leste.” Nia enkoraja partisipante sira atu aproveita formasaun ne’e hodi hasa’e sira nia abilidade no koñesimentu, hodi subliña katak ida-ne’e la’ós de’it kona-ba sertifikasaun maibé mós kona-ba hadi’a sira nia efikásia hodi mantein lei no orden.
Amelia de Araújo husi UADU hato’o esperansa katak kursu ne’e sei oferese esperiénsia prátika direitus umanus no afirma ONU nia kompromisu hodi apoia formasaun PNTL ba aplikasaun lei ne’ebé efetivu no protesaun direitus.
Asistente Inácio Amaral, Segundu Komandante Superintendente Munisípiu Covalima, husu ba nia ekipa atu partisipa ho ativa iha formasaun refere, subliña treinanmentu ne’e hodi hasa’e profisionalizmu no prevene violasaun direitus umanus.
Provedoria Direitus Umanus no Justisa dedikadu atu asegura katak programa formasaun sira hanesan ne’e kontinua hala’o papél ida ne’ebé vital hodi hasa’e kapasidade ofisiál sira ne’ebé responsável ba aplikasaun lei. Hodi investe iha edukasaun no dezenvolvimentu profisionál, Provedoria reafirma nia kompromisu atu salvaguarda direitus umanus no promove boa governasaun iha Timor-Leste.
This post is also available in: English