Data, 07-07-2009
Iha loron 8 to’o 10 Jullu 2009 funsionariu sira husi Provedoria dos Direitos Humanos e Justiça (PDHJ) sei tuir treinamentu prinsipiu baziku kona-ba mediasaun no konsiliasaun.
Objetivu husi treinamentu ne’e atu fasilita funsionariu sira atu komprende kna’ar mediasaun no konsiliasaun ba instituisaun ho natureza hanesan PDHJ, hetan kuñesimentu kona-ba difirensa mediasaun no konsiliasaun. Nune’e mós atu hatene informasaun detallu oinsá instituisaun sira seluk implementa sira-nian kna’ar mediasaun no konsiliasaun, no komprende didiak kna’ar mediador no konsiliador atu bele iha futuru identifika nesesidade kapasitasaun no institusional ba mediasaun no konsiliasaun” hateten Dr. Sebastião Dias Ximenes, Provedor.
“ PDHJ presiza duni atu desenvolve sistema ba mediasaun no konsiliasaun atu bele rezolve kazu sira lalais liu, hasa’e númiru implementasaun rekomendasaun no grante katak iha prosesu ida uniforme ne’ebé bele aplika iha instituisaun nia laran” hatutan Dr. Sebastião.
Treinamentu ne’e sei uza metodolojia aprezentasaun, diskusaun, estudus kazus no role play. Treinamentu ne’e sei implementa husi peritu mediasaun no konsiliasaun na’in rua husi Australia. Partisipasaun treinador ne’e bazeia ba akordu entree Projetu UNDP/OHCHR no Anti-Discrimination Commission no Community Justice Center husi Nortehrn Territory iha Australia.
Tuir Estatuto Provedoria dos Direitos Humanos e Justiça (PDHJ) (Lei 7/2004) Provedor mós iha podér atu hala’o mediasaun no konsiliasaun tuir Artigu 23. Artigu ne’e hateten katak Provedoria dos Direitos Humanos e Justiça nia bele hala’o knaar nu’udar mediador ida ka konsiliador ida iha konflitu ida entree keixozu no entidade ka órgaun ne’ebé sujeitu ba kesar ne’e, bainhira parte rua ne’e hatán malu atu hatada prosesu ida hanesan ne’e. Bainhira parte ida rezeita mediasaun ka konsiliasaun ne’e, Provedor Direitos Humanos e Justiça nian sei hala’o investigasaun ida tomak no halo lia menon sira kona-ba problema ne’e.
Persiza informasaun Kontaktu
Lady Ximenes
Tekniko Profesional Informasaun & Relasaun Públika PDHJ
Telemovel 730 4260 ou 333 1071