Dili – iha loron 5 fulan Abril tinan 2017, Prezidente Conselho Consultivo do Fundo Petrolifero (CCFP) Sr. Mericio Akara akompaña husi nia ekipa desimina informasaun kona-ba fundus petroliferu Timor-Leste nian ba kargu diresaun no xefia sira Instituisaun Provedoria dos Direitos Humanos e Justiça (PDHJ)
Prezidente CCFP Sr. Mericio Akara iha abertura hateten katak, objetivu husi desiminasaun informsaun ne’e atu koalia kona-ba utilizasaun rekursu fundu petroliferu iha Timor – Leste no oinsa kada ano fiskal Timor- Leste foti osan hira husi fundus mina rai hodi ezekusaun.
Mericio hatutan katak, iha parte seluk koalia mós kona-ba presu mina iha merkadu internasional no oinsa ninia impaktu ne’ebé mak iha tinan hira liu ba kotuk, presu mina iha merkadu monu nia impaktu ba Timor-Leste nia orsamentu oinsa.
Tanba ne’e maka CCFP hakarak realiza enkontru ida n’e ho kargu diresaun no xefia sira husi Instituisaun PDHJ nian, atu nune’e bele kopera hamutuk hodi apoia malu diak liu ho CCFP hodi asegura transparansia, kontabilidade, jestaun no investimentu fundu minarai ba bem estar estadu Timor-Leste nian.
Depois sesaun desiminasaun informasaun ne’e, Provedor Dr. Silverio Pinto Baptsita, lori Instituisaun PDHJ nia naran hato’o agradesimentu ba ekipa husi CCFP ne’ebé lidera husi Prezidente rasik fahe ona informsaun ba kargu diresaun no xefia sira.
Liga ho ita nia serbisu ho serbisu balun ne’ebé mak liga ho direitus humanus, boa governasaun kuandu ita halo prosesu ruma ita bele fo hanoin mos ba ita nia autoridade sira ba Parlamentu, Governo oinsa para atu halo jestaun ne’ebé mak mais efisiensia no efikasia, tanba ne’e parte ida husi prinsipiu de boa governasaun.