Dili : Iha loron 29 Janeiru 2020, Provedor Adjunto Boa Governasaun, Dr. Miguel Pereira de Carvalho akompanha husi Diretor Fiskalizasaun no Rekomendasaun, Sr. Bartolomeu Gonçalves, Diretora Assistência Públika (DAP), Sra. Elsa do Rosario Viegas da Costa, Ofisial Hare Tuir Rekomendasaun (HTR), Sra. Laurina Maria Soares Nesi no Ofisial Fiskalizasaun no Rekomendasaun, Sr. Cipriano de Fatima marka enkontru Altu Nivel ho Ministro Agrikultura no Peskas (MAP), Dr. Joaquim José Gusmão dos Reis Martins ne’ebé akompanha husi ninia Diretora Jeral MAP, Diretora Nasional Veterinariu no Diretor Interino DNQB, iha salaun enkontru Ministro MAP-Comoro-Dili.
Objetivu husi enkontru ne’e, atu rona no hetan informasaun husi Sr. Ministro ho nia ekipa kona-ba mekanismu no planu ne’ebé iha ona atu implementa, relasiona ho rekomendasaun PDHJ ne’ebé rekomenda ba MAP iha loron 11 Outubru 2019 kona-ba rezultadu monitorizasaun ba Edifisiu Karantena abandonado iha Mota-Ain, Posto Administrativu Batugade- Munisipiu Bobonaro.
Provedor Adjunto Boa Governasaun (BG), Dr. Miguel Pereira de Carvalho esplika ba Sr. Ministro ho nia ekipa katak, bazeia ba Estatutu PDHJ, kona-ba Rekomendasaun, artigu 47 (3) katak, orgaun ne’ebé simu rekomendasaun ne’e, iha prazu loron 60 nia laran, tenki informa ba Provedora Direitus Humanus no Justisa nian kona-ba medida sira ne’ebé nia foti atu foti ka implementa rekomendasaun hirak ne’ebé simu ona.
Provedor Adjunto informa tan katak, karik implementasaun la iha, Provedora sei haruka relatóriu ba Parlamento Nasional (PN) núdar reprezentante lejítimu husi povu Timor-Leste. Ikus liu karik Parlamento Nasional la halo kazu relasiona ho relatóriu husi Provedora, maka Provedora sei anunsiu ba iha públiku.
Rekomendasaun jeral ne’ebé PDHJ hato’o ba MAP mak hanesan :
- Reativa hikas edifisiu tolu ne’ebé durante ne’e abandonadu iha fronteira Mota-Ain atu bele uteliza hikas tuir ninia funsaun, liu husi preve orsamentu anual 2020 ba reabilitasaun edifisiu tolu ne’ebé hetan estragus.
- Konsidera iha Planu Asaun Anual (PAA) Ministério nian hodi halo rekrutamentu ba funsionárius DNQB hodi bele kontrola exportasaun no importasaun animal no plantas liu husi zona fronteira terrestre.
- Rekruta no destaka urjentemente, pessoal seguransa hodi bele tau matan ba edifisiu karantena hodi kontrola animal ne’ebé importa nomos exporta liu husi fronteira terrestre Mota-Ain.
- Estabelese mini laboratoriu iha fronteira Mota-Ain hodi bele kontrola animal ne’ebé importa nomos exporta liu husi fronteira Mota-Ain
- Rekruta veterináriu ne’ebé qualifikadu atu bele servisu iha mini laboratoriu, karantena hodi kontrola animal ne’ebé importa nomos exporta husi fronteira Mota-Ain.
- Renova akordu exportasaun karau ba Kupang-Indonesia.
- Buka solusaun ba virus Bruceloze ne’ebé provoka karau labele iha oan.
Ministro Dr. Joaquim José Gusmão dos Reis Martins informa ba Provedor Adjunto ho nia ekipa katak, MAP sei hadia no laos abandona edifisiu karantena maibé tanba rekursu ne’ebé sei menus, maibé MAP sei implementa rekomendasaun hirak ne’ebé PDHJ hato’o mai iha MAP relasiona ho edifisiu Karantena MAP iha fronteira Mota-Ain.
Ikus liu, Provedor Adjunto husu ba Sr. Ministro ho nia ekipa sira atu hato’o resposta por eskrita ba PDHJ relasiona ho rekomendasaun hirak ne’ebé hato’o tiha ona tiha tinan kotuk.