Dili – Iha loron 14 Dezembru 2015, Provedoria dos Direitos Humanos e Justiça (PDHJ) Diresaun Governasaun Di’ak Departamentu Promosaun no Edukasaun (DPE) servisu hamutuk ho Comossaun Anti Corrupsaun (CAC), Komisaun Funsaun Públika (KFP) no Inspesaun Jeral do Estado (IJE) fahe informasaun konaba sira nia servisu ida-idak ba funsionariu PDHJ.
Objetivu husi diseminasaun ne’e, mak atu hasa’e prestasaun servisu, responsabilidade, disiplina, integridade no desempeña sira nia funsaun ho loos no mós kontrolu ho efikas no efisênsia husi funsionariu PDHJ. No iha objetivu seluk mak funsionarius hotu husi Instituisaun PDHJ bele hetan koñesimentu liu husi informasuan konaba Papél CAC, KFP no IJE konaba dever, direitu no avaliasaun dezempeñu funsionariu públiku. Atu nune’e funsionariu bele sente responsabilizadu hodi hala’o sira nia servisu bazeia ba regulamentu ne’ebé iha.
Provedor Dr. Silverio Pinto Baptista iha abertura ba atividade ne’e hateten katak, governasuan di’ak sei lori benefisiu no prosperidade ba povu tomak ne’ebé persiza hetan atendimentu optimal husi ema kna’ar nain sira estadu nian. Atu hala’o governasaun di’ak ita sei bazeia servisu tomak iha prinsipius fundamentais ne’ebé aplika iha nasuan demokrátika sira inklui mós iha nasaun Timor Leste hanesan transparênsia no akuntabilidade hodi respeita mós ba direitu no dignidade ema idak-idak nian.
Provedor hatutan katak, ho prinsipius hirak ne’ebé temi iha leten, hala’o servisu ho laran tomak, tuir regras, badinas no integridade ba kna’ar ne’ebé simu nudar servidor estadu no povu nian, nasaun sei hamrik forte no buras ba oin ho progresu a’as. Nune’e mós atu sukat no hare’e to’o iha ne’ebé progresu servisu mak sosiedade sivil no komunidade sira nudar tilun no matan ba implementasaun governasaun sei fó sira nia kontribuisaun atu hadia bainhira iha failansu ka kuran buat ruma.
Provedor mós husu ba funsinariu hotu atu akompaña diak esplikasaun husi orador sira konaba sira nia kna’ar tanba dala ruma ita hala’o servisu mós la’o la tuir regras ou mesmu tuir regras maibe ita presiza nafatin atu haklean tan koñesiemntu, atu nune’e iha futuru la bele komete krime irregularidade iha servisu ida-idak nian.
Oradores iha atividade diseminasaun ne’e mak, Comisario Comissaun Anti Corrupsaun (CAC) Dr. Aderito Antonio Tilman, koalia konaba Papél Komisaun Anti Korrupsaun liga ho krime ne’ebé komete husi Funsionariu Públika, Prezidente Komisaun Funsaun Públika (KFP) Dr. Faustino Cardoso koalia konaba Papél Komisaun Funsaun Públika espesifiku konaba dever, direitu no avaliasaun dezempeñu Funsionariu Públiku no orador ikus mak Inspetor Jeral Estado (IJE) Dr. Fransisco de Carvalho koalia konaba Papél Inspesaun Jeral Estado espesifiku konaba kontrolo internu.