Husi loron 6-8 fulan agostu tinan 2024, ekipa integradu ida ne’ebé kompostu husi Provedoria Direitus Umanus no Justisa (PDHJ), Komisaun Anti Korupsaun (CAC), Komisaun Funsaun Públika (CFP), no Inspesaun Jerál Estadu (IGE) organiza workshop komprensivu ida. Objetivu husi workshop ne’e maka atu hametin governasaun di’ak no direitus umanus, iha sorin seluk kombate korrupsaun iha administrasaun públika.
Workshop ne’e faze daruak hodi halibur ofisiál no funsionáriu superiór na’in 30 husi Ministériu Agrikultura, Peska, Pekuária, no Floresta hodi foka ba governasaun ne’ebé efetivu no protesaun direitus umanus.
Iha abertura workshop ne’e, Provedór-Adjuntu ba Boa Governasaun Rigoberto Monteiro observa katak, “Boa Governasaun no direitus umanus nu’udar asuntu krusiál iha Timor-Leste. Harii nasaun ida ne’ebé livre hosi korrupsaun depende ba iha sistema governasaun ida ne’ebé metin no asegura katak direitus umanus sira hetan protesaun.”
Monteiro subliña katak “governasaun ne’ebe di’ak esensiál atu prevene violasaun sira iha governasaun. Ida-ne’e presiza sensibilidade ba sidadaun sira-nia interasaun ho autoridade públika sira no espetativa aas ba solusaun sira ne’ebé efisiente no efetivu.” Nia enkoraja partisipante sira atu envolve tomak iha formasaun hodi hetan benefísiu másimu.
Workshop ne’e konta ho partisipante notável sira inklui Sekretáriu Estadu Peskas Domingos da Conceição dos Santos, Komisáriu CAC Rui Pereira dos Santos, Diretór Jerál CAC, no Diretóra Promosaun husi PDHJ.
This post is also available in: English