Data, 05-02-2007
Provedória dos Direitus Humanos e Justiça (PDHJ) sei hala’o treinamentu ida iha salaun enkontru PDHJ nian iha Caicoli Dili Timor-Leste. Treinamentu ne’e sei hala’o durante semana rua nia laran hahu iha loron 5 fulan fevereiru tinan 2007 to’o 16 fevereiru tinan 2007.
Objetivo husi treinamentu ne’e mak atu aumenta liu tan kuiñesimentu funsionariu foun PDHJ nian iha area Direitus Humanos. Materia iha treinamentu ne’e mak hanesan, konseitu ho prinsipu báziku kona-ba Direitus Humanos, sistema Direitus Humanos Nasaun Unidas nian, Deklarasaun Universal Direitus Humanos (DUDU), konvensaun internasionál Direitu Sivil no Politiku, Konvensaun Direitus Feto nian (CEDAW), Konvensaun Internasionál Direitu Ekonomia Sosial no Kultura (ICESCR), Konvensaun Direitus Labarik nian (CRC), Konvensaun hasoru Tortura no tratamentu ka kastigu a’at sira seluk (CAT), Direitus Humanos no Konstituisaun RDTL no mós aspeitu Direitus Humanos iha Kodigu Prosesu Penal.
Fasilitator iha treinamentu ne’e mak hanesan, Dr. Sebastião Dias Ximenes provedór, Dr. Silverio Pinto Baptista adjuntor Provedór ba Direitus Humanos, Dr. Aderito de Jesus advogado Timor-Leste, Sr. Joaquim Fonseca, Asessor Direitus Humanos ba Primeiru Ministru RDTL, Sra. Repelita Tambunan husi UNIFEM, no Sra. Carolina Ruddas husi HRTJ-UNMIT (Human Rights and Transtisional Justice Unit-United Nations Integrated Mission in Timor-Leste)
“ treinamentu ne’e importante teb-tebes tanba liu husi treinamentu ne’e bele aumenta liu tan kuiñesimentu funsionariu foun PDHJ nian husi area Direitus Humanos nian, hateten Dr. Silverio Pinto Baptista Adjunto Provedór ba Direitus Humanos.”
Partispantes iha treinamentu ne’e husi funsionariu foun PDHJ ne’ebé foin rekruta iha fulan ida liu ba kuaje ema nain 10 husi area Direitus Humanos no ema nain 10 husi NGO Internasionál no nasionál ne’ebé servisu iha area Direitus Humanos.
Presiza informasaun kontaktu
Lady ximenes
Informasaun & Relasaun Públika
No telp 333 1071 ou no telemovel 726 1843