Iha loron 25 fulan-Janeiru tinan 2025, Provedór Direitus Umanus no Justisa, Virgílio da Silva Guterres ‘Lamukan’, hato’o nia intervensaun iha selebrasaun aniversáriu Diligente nian ba dala 2, mídia timorense dahuluk ne’ebé halo transmisaun tomak iha lian portugés. Eventu ne’ebé hala’o iha auditóriu Fundação Oriente, iha Dili, subliña papél signifikativu ne’ebé Diligente hala’o tiha ona iha paizajen mídia Timor-Leste nian, partikularmente ninia kompromisu hodi halo kobertura ba asuntu krítiku sira hanesan direitus umanus, promosaun lian portugés, no protesaun ba patrimóniu kulturál.
Iha nia intervensaun, Guterres kongratula Diligente ba nia kontribuisaun notável ba jornalizmu durante nia ezisténsia iha tempu badak. Nia subliña importánsia atu mantein integridade lia-loos nian hasoru dezafiu sira, hodi nota katak iha era atuál, lia-loos dala barak hetan atake. Nia nota katak persisténsia hosi Diligente hodi prezerva notísia ne’ebé faktuál no imparsial krusiál iha tempu sira ne’ebé informasaun sala bele taka tiha lia loos.
“Ezisténsia Diligente ne’e krusiál la’ós de’it ba ninia kontribuisaun jornalístika sira maibé mós ba ninia papél hodi promove lian portugés no haburas literasia iha Timor-Leste”, tenik Guterres. Nia rekoñese mídia nia esforsu sira hodi dezenvolve glosáriu ida ne’ebé ajuda lee-na’in sira, profesór sira, no estudante sira atu komprende di’ak liután vokabuláriu no konseitu sira Portugés nian ne’ebé kompleksu. Inisiativa sira ne’e kontribui ba hasa’e abilidade sidadaun timoroan jerasaun tuir mai nian.
Provedór mós subliña knaar mídia nian no importánsia atu proteje direitus umanus iha Timor-Leste, hodi nota katak nasaun ne’e sei luta hela ho nia istória violénsia no luta ba justisa. Nia subliña katak serbisu hosi mídia sira hanesan Diligente iha papél sentrál ba promosaun transparénsia no responsabilizasaun, liuliu hasoru dezafiu sira ne’ebé la’o hela iha sistema polítiku no governasaun nia laran.
Hanoin kona-ba dezafiu luan liu ne’ebé Timor-Leste hasoru, Guterres subliña nesesidade ba progresu kontinua iha luta ba justisa no dezenvolvimentu nasionál. “Iha serbisu barak atu halo. Ita sei iha hela prosesu konstrusaun nian, no Diligente merese ami nia parabéns tanba kontinua hala’o papél krusiál ida hodi promove jornalizmu ne’ebé komprometidu ba lia-loos iha tempu sira ne’ebé maka dalabarak silénsiu prevalese,” nia nota.
Selebrasaun ne’e partisipa mós hosi embaixadór no reprezentante mídia oioin, hodi reforsa importánsia hosi komunikasaun ne’ebé responsavel no ativu hodi avansa dezenvolvimentu no hametin demokrasia. Guterres konklui nia diskursu hodi subliña importánsia atu kontinua misaun ida-ne’e, hodi hatete: “Luta ba liberdade imprensa no direitus umanus tenke konstante. Diligente maka ezemplu ida kona-ba oinsá mídia ida bele kontribui ba ita-nia evolusaun nu’udar sosiedade ida.”
This post is also available in: English