Iha loron 7-8 fulan Novembru tinan 2024, Provedóra-Adjunta ba Direitus Umanus Maria Marilia da Costa, partisipa iha Diálogu no Konsulta Rejionál: Avansa Dezenvolvimentu Direitu Ambientál iha ASEAN, ne’ebé hala’o iha Sekretariadu ASEAN iha Jakarta, Indonézia. Eventu ne’e halibur reprezentante xave sira husi estadu membru ASEAN, organizasaun direitus umanus, no peritu ambientál sira hodi esplora oinsá direitus umanus bele integra iha elaborasaun polítika ambientál iha rejiaun tomak.
Organiza hosi Komisaun Intergovernamentál ASEAN ba Direitus Umanus (AICHR), konsultasaun ne’e ho objetivu atu avansa dezenvolvimentu Kuadru Direitu Ambientál ASEAN nian. Enkuadramentu ne’e buka atu garante katak sidadaun ASEAN hotu-hotu iha asesu ba ambiente ne’ebé seguru, moos, saudavel, no sustentável. Provedóra-Adjunta nia partisipasaun destaka Timor-Leste nia kompromisu ba kolaborasaun rejionál no protesaun ba direitus umanus iha governasaun ambientál.
Provedóra-Adjunta atende maioria sesaun sira, ne’ebé foka ba asuntu xave sira hanesan mudansa klimátika, transfronteirisu nebliña (fo’er/haze), poluisaun urbana, no interligasaun sira entre dezafiu ambientál sira no direitus umanus. Diskusaun sira aborda mós estratéjia sira atu avansa protesaun ba direitu ambientál sira iha ASEAN nia laran.
Hamutuk ho Provedóra-Adjunta, Aureo Savio, Profisionál Superiór ba Boa Governasaun iha PDHJ, mós marka prezensa iha eventu ne’e. Ninia partisipasaun subliña liután PDHJ nia apoiu ba esforsu rejionál sira atu avansa direitu ambientál sira no knaar governasaun di’ak nian hodi alkansa solusaun ambientál sira ne’ebé sustentável.
Konsultasaun ne’e konklui ho kompromisu renovadu husi partisipante hotu-hotu atu kontinua dezenvolve Enkuadramentu Direitu Ambientál ASEAN nian, ho objetivu atu promove aprosimasaun rejionál koordenada ba dezafiu ambientál sira enkuantu garante protesaun ba direitus umanus.
This post is also available in: English