Lahore, Pakistaun | 8 outubru 2026 — Provedór Direitus Umanus no Justisa Timor-Leste nian, Virgílio da Silva Guterres “Lamukan”, partisipa iha Konferénsia Internasionál Aniversáriu ba dala 30 hosi Provedór Punjab, Pakistaun, ne’ebé hala’o iha Lahore ho tema “Papél Instituisaun Provedoria Justisa nian iha Hametin Responsabilizasaun Governasaun nian, no Direitu sidadaun sira nian.”
Konferénsia ne’e halibur instituisaun sira Provedoria nian no delegadu distintu sira hosi nasaun oioin hodi troka esperiénsia, fahe prátika di’ak institusionál sira, no diskute kona-ba papél ne’ebé evolui hosi instituisaun sira Provedoria nian iha promosaun responsabilizasaun, governasaun di’ak, no protesaun ba direitu sidadaun sira-nian.
Nu’udar panelista iha sesaun dahuluk, “Papél ne’ebé evolui hosi Instituisaun Provedoria sira iha Hametin Governasaun Di’ak,” Provedór Virgílio da Silva Guterres fahe esperiénsia Timor-Leste nian iha utilizasaun mekanizmu konstitusionál hodi hametin responsabilizasaun institusionál no rezolve dezafiu sira governasaun sistémiku nian.
Iha ninia intervensaun, ho títulu “Husi Mandatu Legál ba Prátika: Oinsá Provedór Uza Mekanizmu Konstitusionál sira atu Hametin Responsabilidade no Governasaun Di’ak iha Timor-Leste,” nia subliña importánsia atu hakat liu rezolusaun ba keixa individuál sira hodi rezolve kauza abut sira husi mal-administrasaun no problema governasaun nian.
Nia esplika, Konstituisaun Timor-Leste Artigu 27, 150 no 151 fó fundamentu jurídiku importante ida ba mandatu Provedoria dos Direitos Humanos e Justiça (PDHJ), inklui mekanizmu sira ba fiskalizasaun konstitusionál no fiskalizasaun ba inkonstitusionalidade ho omisaun.
Provedór realsa katak, iha tinan haat nia laran iha nia lideransa, PDHJ hato’o ona petisaun 17 ba revizaun konstitusionál no revizaun por omisaun, kompara ho petisaun ida de’it durante instituisaun ne’e nia tinan 16 antes ne’e. Nia nota katak dezenvolvimentu ida-ne’e reflete instituisaun nia utilizasaun ne’ebé aumenta ba nia mandatu konstitusionál hodi rezolve problema sistémiku sira no hametin responsabilizasaun.
Atu ilustra impaktu prátiku hosi mekanizmu sira-ne’e, nia aprezenta kazu sira kona-ba rekrutamentu iha Polísia Nasionál no restrisaun sira ba médiku sira hosi setór públiku ne’ebé pratika privadamente fora hosi sira nia oras ofisiál serbisu nian. Iha kazu rua ne’e, Tribunál fó desizaun a favor ba PDHJ, hodi hatudu oinsá revizaun konstitusionál bele ajuda rezolve kestaun institusionál no regulatóriu sira no fó solusaun ne’ebé definitivu liu.
Nia mós refere ba PDHJ nia petisaun kona-ba auzénsia lejislasaun komprensivu kona-ba protesaun dadus, hodi nota katak maski Tribunál la defende petisaun ne’e, nia rekoñese nesesidade urjente ba lejizlasaun hanesan ne’e. Esperiénsia ida-ne’e, nia esplika, hatudu katak impaktu hosi litigasaun konstitusionál habelar liu vitória sira iha tribunál no bele mós ajuda identifika lakuna lejislativa sira no enkoraja reforma sira iha futuru.
Aleinde litigasaun konstitusionál, Provedór subliña importánsia husi intervensaun polítika no rekomendasaun konstrutiva sira hodi hametin governasaun. Nia sita opiniaun ka parser PDHJ nian kona-ba rekrutamentu judisiál ba Supremu Tribunál Justisa no Tribunál Rekursu foun, ne’ebé aborda kestaun sira inklui transparénsia, méritu, balansu jéneru, konflitu interese potensiál no independénsia judisiál.
Hodi foti esperiénsia sira-ne’e, nia fahe lisaun xave tolu ho maluk instituisaun Provedoria sira: independénsia tenke akompaña ho inisiativa; responsabilizasaun ezije atu rezolve problema sistémiku sira, la’ós de’it keixa individuál sira; no impaktu institusionál habelar liu vitória sira iha tribunál hodi inklui advokasia lejislativa no rekomendasaun polítika konstrutiva sira.
Nia konklui katak evolusaun instituisaun Provedoria nian la’ós nesesariamente kona-ba iha kbiit barak liu, maibé kona-ba halo utilizasaun di’ak liu no efetivu liu ba sira-nia mandatu ne’ebé iha. Instituisaun Provedór ida ne’ebé forte, nia salienta, labele identifika de’it violasaun sira maibé mós ajuda rezolve sira-nia kauza abut no prevene sira atu labele mosu tan.
Partisipasaun Provedoria Timor-Leste nian iha konferénsia internasionál ne’e fó oportunidade atu fahe esperiénsia institusionál nasaun nian no kontribui ba diálogu internasionál kona-ba hametin papél instituisaun Provedoria nian hodi promove responsabilizasaun, governasaun di’ak no direitu sidadaun sira-nian.
PDHJ kongratula Gabinete Provedór Punjab nian iha ninia aniversáriu ba dala 30 no rekoñese ninia kontribuisaun ba promosaun justisa administrativa, transparénsia, responsabilizasaun no protesaun ba direitu sidadaun sira-nian.
Allende konferénsia, delegasaun partisipa iha programa vizita kulturál, istóriku no institusionál sira ne’ebé organiza hosi Gabinete Provedór Punjab nian. Programa ne’e inklui vizita sira ba Asembleia Provinsiál Punjab, Muzeu Lahore, Koléjiu Aitchison, no Galeria Bhagat Singh, no mós vizita ho guia ba fatin istóriku no patrimóniu Lahore nian no vizita ba Fronteira Wagah. Delegasaun ne’e mós vizita Gabinete Provedór Punjab nian hodi hatene liután kona-ba instituisaun nia serbisu no nia viajen tinan 30 nian, inklui nia realizasaun sira, reforma sira no vizaun ba futuru. Vizita sira-ne’e fó oportunidade atu aprende liután kona-ba Pakistaun nia istória, patrimóniu kulturál no instituisaun públika sira, enkuantu hametin interkámbiu profisionál no komprensaun mútua entre delegasaun sira ne’ebé partisipa.
This post is also available in: English