Dili : Iha loron 6 no loron 10 fulan Outubru 2017, Provedor Dr. Silvério Pinto Baptista, oficialmente aprezenta Sr. Domingos Pinto Tavares hanesan Diretor foun Delegasaun Territorial (DT) Maliana no Sr. Paulo Ribeiro hanesan Diretor foun Delegasaun Territorial Rejiaun Administrativa Especial Oe-cusse Ambeno (RAEOA) ba autoridade públikus iha Munisipiu Bobonaro no RAEOA atu hala’o sira nia knaár durante tinan 4.
Provedor esplika ba autoridades públiku sira katak, funsionárius ne’ebé agora dadaun asumi kargu hanesan Diretor laos konfiansa husi superior sira maibé liu husi prosesu selesaun por meritu, no mos ekipa ne’ebé halo selesaun ba kandidatura sira laos deit husi Instituisaun Provedoria nian, maibe ne’e kompostu husi Instituisaun sira mak hanesan husi Prezidente Konselho de Ministru, Komisaun Anti Korupsaun, Inspesaun Jeral do Estado no Komisaun Funsaun Públika. Hahu kedan husi inisiu simu dokumentus to’o fase prosesu entrevista mak nia rezultadu final mak ohin loron ita hotu hatene katak ema sira ne’e mak merese duni atu asumi kargu Diretor iha Delegasaun Territrial.
Provedor husu ba autoridade públikus hotu atu koopera hamutuk ho Instituisaun Provedoria iha Munisipiu tanba prezensa Provedoria laos atu buka autoridades públikus sira nia frakeza maibe buka atu koopera hamutuk hodi dezenvolve no promove no proteje direitus umanus sidadaun hotu nian.
Intensaun ita nia assemblea konstituente no politikus sira iha tempu ne’eba hodi preve artigu 27 iha Konstituisaun RDTL atu establese Instituisaun PDHJ ho hanoin ida katak, ho prezensa PDHJ iha territorial Timor laran tomak atu servisu hamutuk hodi lori dezenvolvimentu diak liu, atu nune’e komunidade sira iha ne’ebé deit bele goja sira nia diretu.
Diretor Delegasaun Territorial Maliana, Sr. Domingos Pinto Tavares, husu ba autoridades tomak atu servisu hamutuk hodi proteje no promove direitus umanus no promove governasaun di’ak iha Munisipiu Bobonaro. Diretor mos hakarak informa ba autoridades sira katak, PDHJ nia prezensa iha Munisipiu laos hanesan inimigo maibe nudar belun diak ida, atu nune’e ita bele servisu hamutuk maske autoridades ida-idak nia servisu ketak-ketak maibe nia objetivu ida deit mak atu lori prosesu dezenvolvimentu Munisipiu Bobonaro lao ba oin. Sé prosesu dezenvolvimentu iha Munisipiu la’o diak no la iha mal administrasaun, la iha violasaun direitus umanus, la iha abuzu poder no mos komunidade sira iha diretu kona-ba sirkulasaun ho livre no hato’o sira nia hanoin ho livre ne’e hatudu katak iha hotu nia esforsu no kontribuisaun diak ba prosesu dezenvolvimentu nian.
Diretor Delegasaun Territorial RAEOA, Sr. Paulo Ribeiro informa mos katak, ejistensia Provedoria iha RAEOA laos atu sai hanesan inimigo ba autoridade no entidade públikus tomak maibé atu sai hanesan belun diak ba ema hotu, liu-liu ema ne’ebé haknar a’an iha administrasaun públiku. Diretor enkoraza no husu ba entidades públiku hotu atu servisu hamutuk, atu oinsa proteje no promove direitus umanus no promove governasaun di’ak.
Secretario Adjunto Munisipiu Bobonaro, Sr. Julio Caero ho agradese no orguilhu simu prezensa Diretor foun PDHJ DT Maliana, atu nune’e bele servisu hamutuk hodi lori prosesu dezenvolvimentu rai doben Timor-Leste lao oin, liu-liu rai doben Bobonaro.
Hakarak hateten tan dala ida katak, reprezenta Prezidente Munisipiu Bobonaro no autoridades linha Ministérial hotu, ami nia odamatan nakloke nafatin ba Instituisaun Provedoria dos Direitos Humanos e Justiça (PDHJ) atu servisu hamutuk, kolabora fatin wainhira mosu failansu iha ita nia komunidade sira nia le’et.