Dili: Loron, 11 Março 2024, Provedor de Direitos Humanos e Justiça, Sr. Virgílio da Silva Guterres “Lamukan” hamutuk ho Provedor Adjunto Boa Governação, Sr. Rigoberto Monteiro, no Provedora Adjunta Direitos Humanos, Sra. Maria Marilia X. C. de O. da Costa, konvoka Enkontru Konsellu Diretivu (EKD) dahuluk iha tinan 2024, ho Diretor Ezekutivu, Chefe Gabinete, Inspektor, inklui kargu Diretores husi Nacional nomos PDHJ Delegasaun Teritorial, Baucau, Maliana, Same, no Oe-cusse.
Objetivu husi enkontru internal ne’e, atu partilla informasaun kona-ba progresu no dezafius servisu husi diresaun no delegasaun territorial idak-idak nian inklui koalia mós kona-ba utilizasaun ba patrimoniu estadu sira hanesan motorizada nomós kareta sira ne’ebé maka destaka ba diresaun idak-idak hodi apoiu ba servisu sira.
Alende ne’e koalia mós kona-ba, preparasaun PDHJ nian hanesan uma nain ba iha enkontru South East Asian National Human Right Institutions Forum (SEANF) ne’ebé maka iha Fulan Abril mai ne’e sei hahu uluk ho First Tekhnical Meeting.
Enkontru Konsellu Diretivu ba loron ohin hanesan enkontru ne’ebé maka foin realiza fila fali hafoin taka tinan 2023. Ne’eduni enkontru ida ohin hanesan enkontru dahuluk Konsellu Diretivu nian iha tinan 2024.
Enkontru Konsellu Diretivu ne’e realiza iha Sala Biblioteca PDHJ Caicoli no hetan partisipasaun masimu husi kargu Chefia no Diretores PDHJ hotu tantu Nacional no Delegasaun Teritorial.