Díli, 03 fevereiru 2025 – Provedór Direitus Umanus no Justisa, Virgílio da Silva Guterres ‘Lamukan,’ hamutuk ho Provedór-Adjuntu Asuntu Boa Governasaun, Rigoberto Monteiro, no ekipa téknika, hatán ba konvite husi Ministru Prezidénsia Konsellu Ministru, Hermenegildo Pereira. Enkontru ne’e hala’o iha Palásiu Governu Díli, ne’ebé foka liu ba asuntu xave sira relasiona ho mandatu Provedór no reforma lejizlativa sira.
Iha sorumutu ne’e, Provedór hato’o apresiasaun ba oportunidade ba enkontru ida ne’e, nune’e mós ba enkontru anteriór ne’ebé hala’o iha tinan kotuk. Nia rekoñese Ministru nia vontade kontinua atu kolabora ho Provedoria Direitus Umanus no Justisa (PDHJ, sigla portugés) ligadu ho asuntu oioin, inklui prosesu lejizlativu ba revizaun Estrutura Orgánika PDHJ nian.
Provedór subliña mós dezafiu estruturál ne’ebé PDHJ hasoru iha fornesementu prestasaun servisu ba sidadaun sira. Atu hatán ba dezafiu sira-ne’e, nia subliña nesesidade atu altera Lei Orgánika atuál PDHJ nian hodi aliña di’ak liután ho ninia ezijénsia operasionál sira. Nu’udar resposta, Ministru Hermenegildo Pereira hato’o nia kompromisu atu fasilita diskusaun sira entre ekipa téknika sira PDHJ nian no Prezidénsia Konsellu Ministrus nian, hodi fó dalan ba konsulta kle’an no konsentrasaun idea iha nível tékniku iha ámbitu prosesamentu ba esbosu Lei Orgánika PDHJ nian.
Iha reuniaun ne’e Provedór informa katak PDHJ akompaña mós kestaun kona-ba proibisaun akumulasaun knaar ba profisionál saúde sira no hato’o mós objesaun ligadu ho kestaun redusaun saláriu ba pesoál balu iha ajénsia notisioza Tatoli. Provedór husu mós atu haree ba reforsu remunerasaun ba profesór sira no pesoál saúde sira, inklui husu atu konsidera aumenta alokasaun orsamentu ba setór edukasaun.
Provedór-Adjuntu Rigoberto Monteiro subliña liután nesesidade ba Timor-Leste atu estabelese enkuadramentu legál ida ba protesaun dadus pesoál no krime sibernétiku, hodi subliña nia importánsia iha transformasaun dijitál nasaun nian.
Enkontru ne’e reafirma kompromisu husi instituisaun rua ne’e ba kolaborasaun kontínua hodi avansa direitus umanus, governasaun di’ak, no melloramentu lejizlativu iha Timor-Leste.
This post is also available in: English