Provedor de Direitos Humanos e Justiça, Dr. Sebastião Dias Ximenes iha loron 08 Fulan Outubru 2014 halo enkontru ba dala ikus nian ho Administrador no funsionariu públiku sira iha Distritu Aileu.
Enkontru ne’ebé hala’o iha salaun administrasaun Distritu Aileu ne’e Dr. Sebastião Dias Ximenes, Provedor hato’o katak agradese tebes ba Administrador Distritu Aileu no mos funsionarius públikus iha Distritu Aileu ne’ebé durante mandatu Provedor nian fó sira nia apoiu tomak ba PDHJ hahu husi tinan 2005-2014. “Ha’u-nia mandatu remata ona nune’e liu husi biban ida ne’e ha’u hasoru malu ho Sr. Administrador Distritu Aileu no funsionariu sira iha Distritu Aileu hodi hato’o ha’u-nia agradesimentu barak ba imi-hotu nia kolaborasaun durante ha’u asumi kargu hanesan Provedor husi tinan 2005-2014. Nune’e mos povo Aileu so bele goza sira-nia direitu no hetan atendementu di’ak, wainhira funsionariu sira hala’o knaar ho di’ak” hateten Provedor.
Iha oportunidade ne’e Provedor hato’o ba funsionariu sira iha Aileu katak, funsionariu públiku nu’udar servidor estadu no povo tenke hala’o servisu ho di’ak tuir prinsipiu boa-governasaun. Nune’e funsionarius públikus presiza hatudu komitementu di’ak bainhira hala’o knaar.
Iha oportunidade hanesan Administrador Distritu Aileu, Martinho Matos hato’o agradesimentu ba Provedor tanba bele hasoru malu ho funsionariu sira. Nune’e durante Provedor nia mandatu bele halo kolaborasaun servisu ho di’ak.
Durante iha Aileu, Provedor mos hasoru malu ho Prezidente Assosiasaun Antigos Combatentes e Veteranos. Iha hasoru malu ne’e Presidente Assosiasaun Antigos Combatentes e Veteranos agradese ba PDHJ nia servisu monitorizasaun liu-liu iha periodu implementasaun Resolusaun Parlamentar no Governu kona-ba operasaun konjunta PNTL no F-FDTL ba grupu ilegais.
Tuir Presidente Assosiasaun Antigos Combatentes e Veteranos hato’o katak durante operasaun konjunta PNTL no F-FDTL hala’o veteranos balun iha Aileu sai vitima.