Jenebra, 2 abril 2026 – Hafoin partisipa iha Enkontru Anuál GANHRI 2026, ne’ebé hala’o husi ha loron 30 fulan-marsu to’o loron 1 fulan-abril tinan 2026 iha Palásiu Nasaun Unidas, Provedór Direitus Umanus no Justisa, Virgílio da Silva Guterres “Lamukan”, hala’o série enkontru estratéjiku sira ho reprezentante sira hosi mekanizmu direitus umanus Organizasaun Nasaun Unidas (ONU) nian.
Durante ninia estadia iha Jenebra, Provedór enkontru ho titulár xave mandatu direitus umanus ONU nian, inklui reprezentante sira husi Unidade Direitu Ekonómiku, Sosiál no Kulturál, Relatór Espesiál (Special Rapporteur) kona-ba Direitu ba Uma Adekuadu, no Relatór Espesiál kona-ba Liberdade Relijiaun ka Fiar nian. Enkontru sira ne’e ho objetivu atu atu hasa’e komprensaun kona-ba mekanizmu sira direitus umanus ONU nian no atu esplora oinsá plataforma internasionál sira ne’ebé eziste bele fó apoiu ba promosaun no protesaun direitus umanus no governasaun di’ak iha Timor-Leste.
Durante diskusaun sira, Provedór destaka Timor-Leste nia progresu iha avansu direitus umanus, partikularmente iha liberdade mídia no dezenvolvimentu demokrátiku, enkuantu nota mós dezafiu sira ne’ebé la’o daudaun, liuliu iha área direitu ekonómiku, sosiál, no kulturál. Nia hato’o preokupasaun xave sira relasiona ho uma adekuadu, servisu saúde públiku, no liberdade relijiaun ka fiar nian.
Provedór subliña importánsia atu hametin kooperasaun ho mekanizmu direitus umanus internasionál sira hodi fó apoiu ba esforsu nasionál sira hodi rezolve dezafiu sira-ne’e.
Nu’udar resposta, reprezentante sira hosi mekanizmu direitus umanus ONU nian simu ho laran-haksolok inisiativa ne’e, introdús sira ida-idak nia mandatu, no espresa sira-nia vontade atu apoia no fasilita envolvimentu iha futuru ho Gabinete Provedoria nian.
This post is also available in: English