Vilnius, Lituánia – Provedór Direitus Umanus no Justisa, Virgílio da Silva Guterres ‘Lamukan’ partisipa Konferénsia Internasionál Anti-Korupsaun (IACC-sigla ingléz), ne’ebé hala’o iha Vilnius, kapitál Lituânia, hosi loron 18 to’o 21 juñu 2024.
Eventu internasionál anti-korupsaun ne’e nudar espasu globál ida ne’ebé halibur instituisaun no movimentu anti-korupsaun hosi nasaun besik 150, inklui akadémiku, governante, ativista, artista, jornalista no defensór direitus umanus hodi fahe esperiénsia, preokupasaun no dezafiu iha prosesu kombate korupsaun no hamutuk identifika medida hodi hakuran no kura moras-aat sosiál ne’ebé kontinua ameasa no estraga sosiedade umana ne’e.
Prezensa Provedór Virgílio Guterres iha konferénsia IACC ba dala XXI iha Lituânia fasilita hosi Grupu Konsultór Dexis Timor-Leste, entidade responsável ba implementasaun programa “Accountability and Integrity Mechanism activity” ne’ebé finansia hosi Ajénsia Internasionál Dezenvolvimentu Estadus Unidus Amérika (USAID).
Aleinde konferénsia IACC, Provedór mós sai oradór iha eventu paralelu ne’ebé organiza hosi Dexis ho nia parseiru sira ho tema “Konsolida atinjimente husi reforma anti-korporativa sira hanesan katalizadór ba transformasaun demokrátiku sira.” Provedór sai oradór hamutuk ho oradór sira seluk hosi Armenia, Moldova, Guatemala no Ukránia.
Konferénsia IACC 2024 hahú iha loron 18 juñu no remata iha 21 juñu ho Deklarasaun Vilnius https://iaccseries.org/the-21st-iacc-vilnius-declaration…/
Organizadór prinsipál konferénsia IACC 2024 mak Transparency International, Lithuanian Centre for Special Investigation, IACC Council no governu Repúblika Lituânia nudar uma-na’in.
Konferénsia IACC tuir mai sei hala’o iha tinan 2026 iha fatin no nasaun ne’ebé organizadór sira sei anunsia.
This post is also available in: English