Díli, 10 marsu 2026– Provedór Direitus Umanus no Justisa, Virgílio da Silva Guterres “Lamukan,” ohin simu vizita kortezia husi Jerald Joseph, eis Komisáriu Komisaun Direitus Umanus Malázia (SUHAKAM), iha eskritóriu PDHJ Dili. Enkontru ne’e sai hanesan plataforma ida ne’ebé importante hodi troka ideia no esperiénsia kona-ba asuntu direitus umanus ne’ebé urjente iha Timor-Leste no iha Malázia no mós dezafiu no oportunidade ne’ebé luan liu iha rejiaun ASEAN nia laran.
Jerald Joseph defensór direitus umanus ho esperiénsia liu tinan 20 ne’ebé espesializada iha direitu Povu Indíjena sira-nian, diskriminasaun rasiál no direitu ekonómiku, sosiál no kulturál. Nia sai hanesan pioneiru ba programa sira la-diskriminasaun nian ne’ebé efetua vizita hosi Relatór Espesiál ONU nian ba Malázia, koordena relatóriu sira hosi ONG Malázia nian ba UPR no serbisu nu’udar Prezidente ba Komité Diretivu Rejionál Fórum Povu ASEAN nian iha 2015. Nia hasai nia kursu Mestradu iha Direitus Umanus hosi Universidade Mahidol, Tailándia.
Provedór Guterres sauda sorumutu ne’e no reafirma kompromisu PDHJ nian atu hametin kooperasaun ho instituisaun rejionál direitus umanus no mekanizmu sira hodi avansa protesaun no promosaun direitus umanus iha Timor-Leste no liutan.
This post is also available in: English