Dili: Loron, 15 Novembro 2023, Sra. Maria Marilia Ximenes Castro de Oliveira da Costa, simu posse hosi Presidente Parlamento Nacional, hodi halao kna’ar nu’udar Provedora-Ajunta ba área Direitus Umanus iha Provedoria dos Direitos Humanos e Justiça to’o períodu 2027.
Iha serimônia tomada de posse ne’e, liuhosi diskursu, Provedor-Adjunta agradese ba Provedor, Sr. Virgílio da Silva Guterres ‘Lamukan’ ba konfiansa hodi hili atu ezerse kna’ar iha área Direitus Umanus.
Aleinde ne’e, Provedor-Adjunta hato’o nia kompromisu tomak hodi hatan ba konfiansa refere atu halao kna’ar iha PDHJ tuir kbi’it no esperiênsia ne’ebé mak iha hodi proteje Direitus Umanus no Liberdade Fundamental sira ne’ebé garante ona iha Konstituisaun RDTL no Instrumentu sira Nasoins Unidas nian.
Iha fatin hanesan, Presidente Parlamento Nacional hato’o felisitasaun no votu susesu ba Provedora-Adjunta, inklui dezeja mós atu mandatu ida ne’e bele ajuda Provedor de Direitos Humanos e Justiça, servi Timor-Leste, sidadaun sira iha defeza ba direitu konstitusional sira no kontinua hare ba justisa no direitus umanus.
Partisipa iha serimônia ne’e, Chefes Bancadas Parlamentares, Chefe Gabinete PDHJ, Sr. Silvino Saldanha Pereira, Secretário Executivo, Sr. Ambrósio Graciano Soares, Diretora Gestão de Recursos Humanos, Sra. Teresinha Ximenes, Diretora Investigação, Sra. Terência Nunes Maia, inklui familiares hosi Provedor-Adjunta.