Dili– Loron 8 Marsu hanesan loron importante ba sidadadun tomak iha mundu inklui nasaun Timor-Leste konsidera hanesan loron internasional ba feto. Tan ne’e, atu selebra loron importante ne’e, Provedoria dos Direitos Humanos e Justiça (PDHJ) hanesan instituisaun nasional direitus umanus servisu hamutuk ho Asosiasaun Chega Ba Ita (ACbit) no Asia Justice and Right (AJAR) sei realiza sorumutu ka dialogu nasional entre reprezentante feto husi area rural husi distrito 13, aktivista feto iha nivel nasional, feto politikus, feto profesionais, deputadas no ministra hodi koalia konaba “Oinsa Asegura Feto hotu nia direitu iha Timor-Leste, partikularmente Feto Vitima Vulneravel ba Programa Asistensia Sosial, Saude no Edukasaun”.
Adjuntu Provedor ba area Direitus Humanos, Dr. Silverio Pinto Baptista hateten katak, atu selebra loron ne’e, sei realiza atividade koalia ba malu (dialogu) ne’ebe involve feto maluk sira hotu iha nivel rural to’o nasional ho objetivu atu koalia konaba asuntu feto maluk balu ne’ebe sei vulneravel ka seidauk hetan atensaun husi programa estado, atu hasae sensibilidade ba realidade no kondisaun feto maluk sira ne’ebe la iha kbi’it hodi asesu ba asistensia estado.
Adjuntu hatutan katak, ho diologu ne’e mos atu buka solusaun hodi hadia mekanismu asistensia social husi ministeriu televante atu asegura feto vitima hotu hetan sira nia direitu, no mos buka solusaun ba fortifika politika no lezislasaun estado hodi asegura feto vulneravel sira nia direitu.
Baseia ba kondisaun ne’e, maka PDHJ hamutuk ho ACbit no AJAR hare katak importante tebes atu tau atensaun no esforsu hamutuk hodi hadia situasaun ida ne’e, no hakarak kontribui netik buat ruma ba buka solusaun ka hadia problema ne’e iha momentu selebrasun loron internasional ba feto.
“Ho esperansa katak iha ispiritu solidariedade, igualdade no nasionalismu ba feto faluk sira hotu iha Timor-Leste, feto maluk sira husi area rural, nasional, governantes, politikus no ministra sira bele halibur iha loron especial ne’e, hodi koalia ka troka ideia ba malu ho laran nakloke atu buka dalan diak atu nune’e feto maluk hotu bele goja sira nia direitu hanesan”. Espera Adjuntu Provedor.
Aktividade diologu ne’ebe sei realiza iha loron 8 Marsu, sei hetan partisipasaun husi Ministra Solidariedade Sosial, Vice Ministra Edukasaun, vice Ministra Saude, Secretaria Estado ba Promosaun Igualdade (SEPI) no mos Presidente Comisaun F, A no D Parlamento Nasional.
Aliende ne’e mos, iha painel ida husi PDHJ, husi Presidente Grupo Mulheres Parlamentar Timor-Leste (GMPTL) no mos ida husi Ativista Feto.
Presiza Informasaun Kontaktu
Lady Ximenes, No Telemovel 7730 4260
ou Jóse Tefa 7735 1412 ou 3331071.