RAEOA, 26 agostu 2025 – Provedór Direitus Umanus no Justisa (PDHJ) Delegasaun Territoriál RAEOA, ne’ebé lidera husi Diretór Bartolomeu Gonçalves no akompaña husi Ofisiál Promosaun José Tefa no Investigadór Paulo António Lafo, hala’o sesaun divulgasaun iha Eskola Sekundária João Maria Vianney Padiae-RAEOA.
Sesaun ne’e foka liu ba introdús estudante sira kona-ba papél PDHJ, prinsípiu direitus umanus, governasaun di’ak, no prosedimentu ba hato’o keixa. Eventu ne’e hala’o ho kolaborasaun ho Polísia Nasionál Timor-Leste (PNTL) – Rejiaun Oé-Cusse no Ekipa Sub-Komisaun Reguladóra Arte Marsiál (KRAM), ne’ebé fahe sira nia mandatu kona-ba prevene atividade kriminoza no regula grupu arte marsiais sira iha rejiaun ne’e.
Diretór eskola, profesór sira, no estudante na’in 74 (feto na’in 37 no mane na’in 37) partisipa ativamente iha sesaun ne’e. Reprezentante eskola sira hato’o apresiasaun, hodi nota katak eventu ne’e fó ba estudante sira informasaun ne’ebé iha valór diretamente husi instituisaun estadu nian. Komandante Polísia ne’ebé reprezenta adjuntu komandante eskuadra Pante Makassar ne’e mós simu ho laran-haksolok oportunidade atu servisu hamutuk ho PDHJ iha programa sensibilizasaun.
KRAM nia prezidente hato’o nia satisfasaun hodi adere ba PDHJ nia atividade sira no sujere kolaborasaun iha futuru entre instituisaun sira hodi hametin esforsu divulgasaun ba parte interesada sira iha Oé-Cusse. Estudante sira fahe feedback pozitivu, hodi hateten katak sira kontente atu aprende diretamente husi reprezentante PDHJ, PNTL, no KRAM.
This post is also available in: English