Date : 31-05-2011
Provedor Adjunto Direitus Humanus Dr. Silverio Pinto Baptista partisipa programa treinamentu Internasional Direitus Humanus, Dame no Seguransa iha Sweden iha loron 2 to’o 22 Maiu 2011.
Partisipante ne’ebe hola parte iha programa treinamentu ne’e kompostu husi nasaun 5 hanesan Colombia, Cambodia, Sierra Loena, Liberia inkluindu Timor Leste rasik.
Partisipantes Timor Leste ne’ebe partisipa iha programa treinamentu ne’e mai husi Organizasaun Naun Governamental (ONG) Judicial Sistem Monitoring Program (JSMP) direitamente husi Director, Luis de Oliveira Sampaoi, Xisto Gonçalves husi ONG Forum Tau Matan (FTM), Maria Mirilia Ximenes husi ONG BELUN no Liliana Amaral husi ONG internasional CRC. Hateten Provedor Adjunto Direitus Humanus Silverio Pinto Baptista.
Partisipante nain 5 husi Timor Leste ne’ebe temi iha leten pasa iha selesaun intrevista no concept note ne’ebe hala’o direitamente husi consultan senior husi programa Indevelop SIDA.
Materia ne’ebe hetan husi partisipantes Timor Leste hanesan passu importante tebes tamba iha relasaun maximu ho kondisaun Timor Leste oras ne’e dadaun.
“Tamba ita hotu hatene, parte Timor Leste hanesan parte nasaun post konflitu, tan ne’e ho materia ne’ebe ami (Partisipantes Red) aprende durante treinamentu ne’e iha relasaun duni ho kondisaun rai laran Timor Leste”, esplika Provedor Adjunto Direitus Humanus.
“Wainhira komponente sosiadade tomak bele dezenvolve konfiansa ba malu, iha fatin vertical cidadaun, estadu no parte horizontal individus-individus, maka ita bele reduz no hapara konflitu ne’ebe mosu iha ita nia komunidade. Karik mak laiha tan konflitu entaun ema barak mak sei partisipa iha programa dezenvolvimentu nasional”, tenik Provedor Adjunto
Benefisiu programa treinamentu ne’e ba PDHJ mak, bele aplika wainhira halo planu annual ba PDHJ nian sei usa right based approach (RBA) hanesan prinsipiu-prinsipiu non diskriminasaun, akontabilidade, transperensia no partisipasaun
Durante programa treinamentu Internasional Direitus Humanus, Dame no Seguransa iha Sweden fundus mai husi Governo Sweden liu husi SIDA.
Presiza informasaun bele kontaktu José Tefa ho númeru telemovel, 7351412, Ledy Ximenes 730 4260 (Relasaun Publika PDHJ )