Dili, 2 setembru 2025 – UN Women, UNICEF, Unidade Asesoria Direitus Umanus ONU nian, no parseiru sira hala’o enkontru ida hodi haree fila fali progresu projetu “Hakbi’it ba Inkluzaun”, ne’ebé ho objetivu atu hamenus violénsia no diskriminasaun hasoru feto no labarik-feto sira ho defisiénsia iha Timor-Leste. PDHJ partisipa iha enkontru projetu Komisaun Diretiva daruak ne’e, ne’ebé reprezenta husi Provedóra-Adjunta Direitus Umanus, Maria Marilai da Costa. Enkontru ne’e fornese plataforma ida ba parseiru implementadór sira atu fahe atualizasaun, dezafiu, no rekomendasaun sira, no destaka prátika di’ak sira husi Organizasaun Ema ho Defisiénsia (OEhD) no instituisaun governu nian ne’ebé fornese servisu ba ema ho defisiénsia sira.
Parseiru sira relata kona-ba atividade advokasia no monitorizasaun relasiona ho implementasaun Konvensaun Direitu Ema ho Defisiénsia (CRPD). Organizasaun Ema ho Defisiénsia subliña katak Konvensaun ne’e seidauk implementa ho kompletu, tanba ema barak sei la hatene kona-ba nia provizaun sira. Reprezentante Governu sira reafirma sira-nia kompromisu atu kontinua fasilita monitorizasaun no avaliasaun, maski relatóriu ofisiál kona-ba implementasaun CRPD ba 2021–2024 sei iha hela preparasaun.
Sesaun ne’e konklui ho aprezentasaun planu asaun ba trimestre ikus tinan 2025. Partisipante sira inklui reprezentante husi MSSI, MJDAC, SEI, Organizasaun EhD, CBRNTL, RHTO, no ADTL.
This post is also available in: English