Data 06-12-2007
Provedoria dos Direitos Humanos e Justiça (PDHJ) liu husi Divizaun Direitos Humanos iha loron 06 Dezmebro hala’o cerdas cermat ba estudantes sira husi eskola Sekundaria iha Kapital Dili iha Salaun Parokial Becora.
Cerdas cermat ne’e organiza husi PDHJ, UNMIT, Fokupers, ICMC, Gabinete Primeiru Ministru (GPM) Asosiasaun HAK no Ministeriu Edukasaun no Kultura. Atividade ne’e nu’udar parte ida husi atividade sira seluk atu selebra loron direitos humanos ba dala 50 ne’ebé selebra iha mundu tomak 10 Dezembro.
Materia iha cerdas cermat ne’e kona-ba Direitos Humanos, Edukasaun Sivika, Konstituisaun RDTL no Istoria Timor-Leste. Partisipantes lomba cerdas cermat mak hanesan SMU 10 Dezembro, SMU Cristal, SMU 20 September Metinaro, SMU Paulus VI, SMU Hati Kudus Yesus, SMU Sto. Yoshep, SMU Canossa, SMU 28 Novembro no SMU 4 September.
“Cerdas cermat ne’e nu’udar sasukat ka meus ida atu bele habelar no fó kuinesimento di’ak ba komunidade ka sosiadade kona-ba leis no sidadaun ne’ebé di’ak”hateten Adjunto Provedór Dr. Silverio Pinto Baptista.
Dr. Silverio hatutan tan “liu husi atividade ne’e atu haree fila fali ba estudantes sira ne’ebé reprejentantes husi edukasaun katak atu bele haree no avalia kona-ba materia direitos humanos, edukasaun civika, konstituisaun RDTL no Istoria Timor-Leste ne’ebé implementa iha baze hanesan ka lae”.
Adjunto Provedór hateten katak “Provedór sei espera katak ho cerdas cermat ne’e Repúblika Demokratika de Timor-Leste (RDTL) sei proteje no promove direitos humanos iha teritoriu laran”.
Bazeia ba Artigu 27 Lei-Inan Timor-Leste nian, ne’ebé prevee ona kona-ba ezisténsia Provedór Direitos Humanos no Justiça nu’udar órgaun indepedente ida ne’ebé iha knaar hodi promove no protéje Direitos Humanos iha Nasaun Timor-leste.
Presiza informasaun Kontaktu
Lady Ximenes
Informasaun & Relasaun Públika PDHJ
Telemovel 726 1843 ou 333 1071