Manatuto, 29 agostu 2026 — Provedór ba Direitus Umanus no Justisa (PDHJ) no Ministériu Administrasaun Estatál (MAE) asina ona Kontratu Interadministrativu ida ne’ebé ho objetivu atu lori direitus umanus, direitu fundamentál sira, governasaun di’ak no servisu sira tratamentu ba keixa sira besik liu ba sidadaun sira liuhosi Governu nia Balcão Único no Portál Munisipál.
Asina husi Provedór PDHJ Virgílio da Silva Guterres “Lamukan” no Ministru Administrasaun Estatal Tomás do Rosário Cabral, akordu ne’e estabelese servisu ne’ebé atu presta husi PDHJ liu husi Balcão Único no Portal Munisipál. Inisiativa ne’e dezeña atu apoia Governu nia esforsu sira hodi desentraliza servisu públiku sira, hadi’a asesu ba informasaun no fasilita sidadaun sira-nia interasaun ho administrasaun públika. Kontratu ne’e asina iha Manatuto iha loron 29 agostu 2026 no válidu ba períodu indefinidu.
Tuir akordu ne’e, sidadaun sira sei bele hetan asesu ba informasaun atualizadu kona-ba direitus umanus no direitus fundamentais, inklui direitus ne’ebé rekoñese ona iha Konstituisaun Timor-Leste no instrumentu direitus umanus internasionál ne’ebé ratifika ona husi nasaun ne’e. Liuhusi Portál Munisipál, PDHJ mós sei fornese informasaun kona-ba governasaun di’ak, inklui prinsípiu sira kona-ba legalidade, imparsialidade, transparénsia no akuntabilidade, no mós formuláriu eletróniku sira atu hato’o keixa sira ba PDHJ.
Liuhusi Balcão Único, PDHJ sei fornese informasaun personalizadu kona-ba direitus umanus no fundamentais, informasaun kona-ba governasaun di’ak no sidadaun sira-nia direitu iha sira-nia relasaun ho administrasaun públika, no simu keixa sira ne’ebé tuirmai sei enkamiña ba PDHJ hodi halo akompañamentu apropriadu. Akordu ne’e prevee atribuisaun ba membru pesoál PDHJ na’in rua atu fó apoiu ba servisu sira ne’e no presiza formasaun téknika ne’ebé apropriadu, inklui koñesimentu kona-ba lejizlasaun ne’ebé aplikavel, governasaun di’ak no prosedimentu sira atu simu, rejista no enkamiña keixa sira.
Akordu ne’e mós estabelese padraun sira ba kualidade servisu nian, inklui ezatidaun no atualiade informasaun, asesibilidade ba formuláriu sira, resposta ba nesesidade utilizadór sira nian no enkamiña keixa sira nian iha tempu ne’ebé loos. Dezempeñu servisu nian sei avalia liuhosi indikadór sira hanesan satisfasaun utilizadór nian, númeru utilizadór sira ne’ebé hetan atendimentu, asesu ba informasaun no formuláriu sira online, keixa sira ne’ebé simu no haruka, no keixa sira utilizadór nian kona-ba kualidade servisu nian.
Ba PDHJ, parseria ne’e reprezenta pasu importante ida hodi hakbesik instituisaun ba komunidade sira, partikularmente sidadaun sira ne’ebé bele hasoru barreira jeográfika, ekonómika ka sosiál hodi asesu diretamente ba servisu PDHJ nian. Hodi disponibiliza mekanizmu informasaun no keixa direitus umanus liuhosi pontu fokal munisípiu no plataforma dijitál sira, inisiativa ne’e hametin oportunidade ba sidadaun sira atu komprende sira-nia direitu, buka asisténsia no hamosu preokupasaun sira kona-ba direitus umanus no governasaun di’ak.
Akordu ne’e konklui tuir Artigu 8 hosi Dekretu-Lei Nú. 3/2025 hosi loron 22 fulan-Janeiru, ne’ebé prevee kontratu interadministrativu sira ne’ebé define bens no servisu sira ne’ebé sei fornese hosi órgaun no entidade públiku sira liuhosi Balcão Único no Portál Munisipál. Le’e kontratu administrativa iha ne’e: https://www.pdhj.tl/wp-content/uploads/2026/09/Contrato-Interadministrativo-PDHJ-MAE.pdf
This post is also available in: English