Distrito Dili-Provedoria dos Direitos Humanos e Justiça (PDHJ), liu husi Diresaun Nasional Boa Governasaun, Departamentu Promosaun no Edukasuan, Inspeksaun Geral do Estado (IGE) no Inspesaun Jeral Ministerio da Edukasaun (IJ-ME) kontinua fó treinamentu ba Direitor Escola Ensino Baziku Central, Chefi Gabinete Apoiu Tekniku no Professores sira iha Distrito Dili. Treinamentu refere hala’o durante loron 3 hahu husi loron 03-05 Setembru 2014, iha salaun Instituto de Formação dos Dosente e dos Professores (INFORDEPE) Ministeriu Edukasaun iha Balide-Dili.
Dr. Rui Pereira dos Santos, Provedor Adjunto ba area Boa Governasaun, enkoraja nafatin partisipante sira atu partisipa treinamentu ne’e ho seridade to’o remata. Dr. Rui hatutan katak, liu husi treinamentu ne’e hodi fó hanoin nafatin ba direjentes edukasaun iha eskola hotu iha territoria laran, atu nune’e hala’o servisu tuir prosedimentu legal ne’ebé establese ona hodi nune’e iha futuru servisu hirak ne’ebé edukador sira hala’o bele la’o tuir legalidade hodi prevene irregularidade.
Virgilio Freitas, Superitendete Distritu Dili hateten direjentes Ministeriu Edukasaun iha Distritu Dili presiza duni kapasitasaun liu-liu kona-ba area boa-governasaun hodi nune’e bele hala’o knaar ho di’ak.
Virgilio hatutan nu’udar ho kapasitasaun refere bele hasa’e koñesimentu lideransa sira nian hodi bele servisu hamutuk hodi hala’o jestaun ne’ebé di’ak iha Ministeriu Edukasaun liu-liu iha Distritu Dili.