Provedoria dos Direitos Humanos e Justiça (PDHJ) liu husi Diresaun Nasional Direitus Humanos, Departamentu Promosaun no Edukasaun halo aprezentasaun manual direitos humanos ba komandante PNTL iha Sentru Formasaun PNTL iha Comoro Dili, liu husi workshop loron ida (04 Novembru 2014).
Marina Bernadina Gaio, Xefe Departamentu Promosaun no Edukasaun hateten antes elabora manual treinamentu ba PNTL PDHJ halo koperasaun servisu ho Sentru Formasaun PNTL hodi kria ekipa apoiu hakerek manual. Ekipa ne’ebé hakerek manual refere husi PDHJ, Sentru Formasaun PNTL no Unidade Assesoria ba Direitos Humanos iha Timor-Leste.
Marina esplika katak ekipa refere nia funsaun maka organiza no kontribui ideas hodi dezenvolve manual direitos humanos. Materia ne’ebé inklui iha manual ne’e maka pakote baziku no materiais adisional. Metodolojia ne’ebé sei inklui iha manual maka aprezentasaun, estudu kazu, ezersisiu, kuis no analize ba filme kona-ba direitos humanos.
Objetivu husi manual maka atu intrega efikasia direitus humanos iha kurikulum PNL nian no mos atu sai matadalan ba fasilitador sira hodi uza ho uniforme ba materia direitos humanos ba PNTL, hodi nune’e bele reforsa kapasidade PNTL hodi hala’o knaar iha terenu tenke respeita no protege ema nia direitos humanos.
Dr. Silverio Pinto Baptista, Provedor hateten PDHJ nu’udar instituisaun direitos humanos maka iha mandatu hodi promove no protege direitos humanos. Nune’e PDHJ nia funsaun maka atu tau matan ba entidades publiku sira mak hanesan PNTL, F-FDTL, Guarda Prizaun, Profesores no sira seluk. Tan ne’e PDHJ iha knaar hodi halo kapasitasaun ba entidades públiku sira inklui membros PNTL.
Provedor hatutan PNTL maka primeira instansi hodi reprezenta estadu Timor-Leste hodi halo promosaun no protesaun direitos humanos nune’e PDHJ iha dever hodi kapasita PNTL hodi nune’e bele hala’o knaar ho profesional no mos tuir legalidade.