Manatuto, 13 agostu 2026 — Delegasaun Territoriál Provedoria Direitus Umanus no Justisa (PDHJ) iha Baucau hala’o sesaun diseminasaun ba estudante Eskola Técnico Vokasionál Mahunu Bukar (ESTV Mahunu Bukar), iha Postu Administrativu Manatuto, Munisípiu Manatuto. Atividade ne’e ho objetivu atu hametin estudante sira-nia komprensaun kona-ba papél instituisaun públika, prinsípiu fundamentál direitus umanus, governasaun di’ak, no prosedimentu atu hato’o keixa ba PDHJ.
Adjuntu Diretór no reprezentante eskola, Albino da Costa Moniz, hato’o nia apresiasaun ba PDHJ ne’ebé hala’o atividade ne’e, hodi nota katak foin primeira-vez PDHJ halo vizita ba ESTV Mahunu Bukar. Nia simu ho laran-haksolok oportunidade ba estudante sira atu hetan komprensaun di’ak liután kona-ba papél no responsabilidade sira instituisaun Estadu nian, partikularmente iha relasaun ho direitus umanus no governasaun di’ak. Nia subliña katak koñesimentu ne’ebé boot liután bele ajuda estudante sira komprende no proteje sira-nia direitu, kontribui ba promove governasaun di’ak, no hatene iha ne’ebé atu buka asisténsia bainhira sira fiar katak sira-nia direitu bele hetan violasaun, inklui liuhosi mekanizmu keixa ne’ebé disponivel iha PDHJ.
Sesaun ne’e mós fó oportunidade ba estudante sira atu fahe pergunta no preokupasaun relasiona ho sira-nia direitu, inklui asesu ba edukasaun. Estudante balun hato’o preokupasaun kona-ba difikuldade ne’ebé sira hetan bainhira buka atu kontinua sira-nia edukasaun iha eskola sekundária jerál hafoin kompleta ensinu rekorrente iha ESTV Mahunu Bukar. Enkuantu preokupasaun sira-ne’e bele presiza avaliasaun liután hosi autoridade relevante sira, diskusaun ne’e hatudu importánsia atu kria espasu sira iha-ne’ebé foin-sa’e sira bele aprende kona-ba sira-nia direitu, hato’o preokupasaun sira, no komprende mekanizmu apropriadu sira ne’ebé disponivel atu buka klarifikasaun ka asisténsia.
Sesaun diseminasaun ne’e hetan partisipasaun husi partisipante hamutuk 73, kompostu husi estudante mane 40 no feto 33, hamutuk ho reprezentante husi Gabinete Edukasaun Munisipiu no dosente sira. Liuhusi atividade sira hanesan ida-ne’e, PDHJ kontinua lori konxiénsia kona-ba direitus umanus no boa-governasaun besik liután ba estudante no komunidade sira, enkuantu enkoraja foin-sa’e sira atu sai informadu liután kona-ba sira-nia direitu, responsabilidade, no papél instituisaun públika nian hodi proteje no promove sira.
This post is also available in: English