Date : 25-09-2012
Dili- Provedoria dos Direitos Humanos no Justisa no ekipa servisu hanesan, Ministeriu Justisa, Ministeriu Negosiu Estranjeiru no Sosiadade Sivil hanesan Asosiasaun HAK, Forum Tau Matan no Fundasaun Alola, habelar rekomendasaun husi Konsellu Direitus Umanus ONU ba estadu Timor-Leste relasaun ho Revizaun Periodiku Universal (RPU) liu husi workshop ne,ebé sei hala’o iha loron 27 fulan Setembru 2012 iha edifisiu Ministeriu Negosiu Pantai Kelapa Dili.
Silverio Pinto Baptista, Adjuntu Provedor ba area Direitus Umanus hateten objetivu husi workshop ne,e atu hato’o rekomendasaun RPU ba entidades estadu, integra rekomendasaun ba planu asaun anual no públiku bele hatene situasaun atúal Direitos Umanus iha Timor-Leste.
Silverio informa katak, Estadu Timor-Leste nu’udar membru ONU iha obrigasaun atu relata situasaun réal direitus umanus iha Timor-Leste ba membrus konsellu Direitus Umanus ONU nian. Responde ba ezijénsia ne,e Governu Timor-Leste reprezenta Estadu, Provedoria nu’udar instituisaun independente direitus umanus no mos sosiadade Sivíl, hetan apoiu tekniku no finanseiru husi UNMIT-Seksaun Direitus Umanus no Justisa Tranzisionál kona-ba prosesu hakerek relatóriu RPU.
Husi prosesu konsultasaun hafoin elaborasaun ba relatóriu RPU, iha Fulan Outubro 2011, Estadu Timor-Leste submete relatóriu ba konsellu Direitus Umanus kona-ba RPU durante sesaun dala sanulu resin rua ba estadu membrus sira iha konsellu direitus umanus iha Jenebra. Iha mos submisaun relatóriu husi Instituisaun Direitus Umanus (PDHJ) hamutuk ho Sosiadade Sivil inklui reprezentante ONU iha Timor-Leste, Silverio hatutan.
Hatutan ba relatoriu RPU ne,e, konsellu Direitus Umanus halo revizaun no husi prosesu revizaun ne,e konsellu Direitus Umanus aseita hodi hamosu rekomendasaun bazeia ba relatóriu haat (4) ne,ebé submete husi Timor-Leste.
Adjuntu Provedor ba area Direitus Umanus, haforsa tan katak, iha Fulan Marsu 2012, Konsellu Direitus Umanus nian hala’o sesaun plenaria ba Timor-Leste, iha prosesu ida ne,e Timor-Leste bele responde ba membrus Konsellu Direitus Umanus ONU nian kona-ba rekomendasaun hirak ne,ebé maka seidauk fó resposta durante sesaun revizaun nian.
Liu tan Silverio hateten depois prosesu tomak ne,ebé hala’o tiha ona, maka oras ne,e dau-daun faze importante maka oinsa atu informa rezultadu ou rekomendasaun hirak ne,ebé hato’o husi Konsellu Direitus Umanus ba estadu Timor-Leste hodi habelar informasaun hirak ne,e ba entidades estadu inklui povo Timor-Leste tomak. Tanba liu tiha tinan ha’at estadu sei relata tan ba implementasaun husi rekomendasaun ne,e rasik. Estado Timor-Leste iha obrigasaun primaria atu integra rekomendasaun RPU ba iha planu asaun governu Timor-Leste nian nu’udar reprezentante Estadu hodi implementa rekomendasaun hirak ne,e.
Ikus liu Silverio espera katak, liu husi workshop ne,e bele iha inpaktu pozitivu maka hasa’e kuñesimentu membru estadu no komunidade kona kona-ba RPU.
Presiza Informasaun Kontaktu Lady Ximenes, Relasaun Públika PDHJ
Ho númeru telemovel: +670 77304260 ou liu husi email; ladynhaximenes@yahoo.co.id