Ave Caicoli, Dili, Timor-Leste

info@pdhj.tl

  • tp
  • en

PDHJ Apela Promove Sosiedade Inkluzivu iha Komemorasaun Loron Nasionál Ema ho Defisiénsia

Dili, 4 jullu 2024 – Provedóra-Adjunta Direitus Umanus, Maria Marilia da Costa, apela ba entidade hotu-hotu atu promove sosiedade Timor-Leste ida ne’ebé inkluzivu liu iha komemorasaun Loron Nasionál Ema ho Defisiénsia iha loron 4 fulan jullu tinan 2024 iha Palásiu Prezidensiál Nicolau Lobato, Dili.

Iha okaziaun ne’e Provedóra-Adjunta bolu entidade hotu nia atensaun atu refleta ho seriedade artigu sira ne’ebé kontempla iha Konstituisaun RDTL. Liu-liu artigu 16 ne’ebé garante sidadaun hotu-hotu iha direitu no obrigasaun hanesan iha lei nia oin, no proibidu diskriminasaun tanba ema nia orijen étniku, rasa, estadu sívil ká tanba ema nia kondisaun fíziku eh mentál. Nia husu mós atu refleta artigu 21 ne’ebé hamatan espesífiku ba ema ho defisiénsia fízika no mentál, katak sira iha direitu no mós obrigasaun hanesan sidadaun sira seluk no estadu iha obrigasaun atu proteje no promove tuir lei haruka.

Provedóra-Adjunta rekoñese esforsu pozitivu sira ne’ebé estadu halo ona hanesan ratifikasaun Konvensaun Direitu Ema ho Defiénsia, aprova ona Polítika Nasionál no Inkluzaun no Promosaun ba Direitu Ema ho Defisiénsia no Planu Asaun Nasionál ba Ema ho Defisiénsia, preve Pensaun Sosiál Invalidéz no medida pozitivu husi entidade hotuhotu hodi promove ema ho defisiénsia.

Maske nune’e Marilia da Costa rekoñese mós katak iha sirkuntánsia balun ema ho defesiénsia sira sei hasoru bareira no diskriminasaun oioin husi estadu, sosiedade inklui sira nia família rasik. Nune’e esforsu sira atu proteje no promove ema ho defisiénsia ténke kontinua.

Provedoria Direitus Umanus no Justisa (PDHJ) nu’udar órgaun konstitusionál independente ida, iha mandatu espesífiku atu proteje direitus umanus, hametin integridade no promove governasaun di’ak. Liu husi atividade sira hanesan simu keixa, advokasia, promosaun, monitorizasaun, investigasaun no rekomendasaun, PDHJ iha papel krusiál atu asegura protesaun ba ema vulneravel inklui ema ho defisiénsia.

Iha Loron Nasionál ba Ema ho Defisiénsia, mai ita hamutuk hodi respeita, proteje, no kumpre direitus umanus ema ho defisiénsia iha Timor-Leste.

This post is also available in: English

Notisia seluk

Provedóra-Adjunta Direitus Umanus, Partisipa iha Enkontru ba Estabelesimentu Inter-NHRI Inquiry Mechanism

Quezon, Filipina, 26-27 juñu 2024 – Provedóra-Adjunta ba área Direitus Umanus Maria Marilia da Costa ho Ofisiál Investigasaun Valerio Magno Ximenes, partisipa iha enkontru...

Provedoria Direitus Umanus no Justisa Aprezenta Relatóriu Anuál 2023 ba Parlamentu Nasionál

Dili, 25 juñu 2024 - Provedoria Direitus Umanus no Justisa (PDHJ) liu husi sesaun Plenária Ordinária iha loron 25 juñu aprezenta relatóriu anuál tinan 2023...

Provedór Direitus Umanus no Justisa Partisipa Konferénsia Anti-Korupsaun (IACC) XXI

Vilnius, Lituánia - Provedór Direitus Umanus no Justisa, Virgílio da Silva Guterres ‘Lamukan’ partisipa Konferénsia Internasionál Anti-Korupsaun (IACC-sigla ingléz), ne'ebé hala'o iha Vilnius, kapitál Lituânia,...

Provedór-Adjuntu Partisipa Reuniaun Konsellu Dokumentu Programa PNUD

Provedór-Adjuntu ba Boa Governasaun, Rigoberto Monteiro partisipa iha Reuniaun Konsellu Dokumentu Programa PNUD ni’an iha 21 juñu 2024 iha Salaun Nobre Ministériu Negósiu Estranjeiru...