Dili: Loron, 12 Março 2024, Diretor Ezekutivu AJAR, Sr. José Luis de Oliveira, hamutuk ho nia estrutura hotu marka prejensa iha edifisiu Provedoria dos Direitos Humanos e Justiça (PDHJ) hodi enkontru kortejia ho Provedor de Direitos Humanos e Justiça, Sr. Virgílio da Silva Guterres “Lamukan” ho nia Estrutura.
Objetivu husi enkontru ne’e maka elabora kooperasaun entre PDHJ no Organizasaun Naun Governamental (ONG) Asia Justice and Rights (AJAR) nune’e ba oin ne’e advokasia saida maka PDHJ ho AJAR presija hare hamutuk liga ba asuntu direitus umanus nian.
Maske antes ne’e PDHJ no AJAR iha ona kooperasaun hamutuk hodi produs telenovela badak ho topiku Laloran Justiça, ne’ebé refleta tebes kondisaun ka realidade sosiedade timoroan ne’ebé mak hamrok ba direitu no justisa. Tanba telenovela ne’e mós hanesan instrumentu hodi habelar servisu PDHJ nian iha área protesaun no promosaun direitus umanus nomos sai hanesan instrumentu hodi halo advokasia ba asuntu direitus humanus ne’ebé mak Estadu Timor-Leste seidauk implementa.
Ne’eduni ho enkontru ida ne’e bele hametin liu tan kooperasaun entidades rua ne’e nian hodi hamutuk halo advokasia ba área protesaun no promosaun direitus umanus iha Timor-Leste.
Enkontru ne’e rasik realiza iha Sala Biblioteca PDHJ, ho partisipasaun husi Provedor Adjunto Boa Governação, Sr. Rigoberto Monteiro, Provedora Adjunta Direitus Umanus, Sra. Maria Marilia X. C. de O. da Costa. Secretariu Ezekutivu, Sr. Ambrosio Graciano Soares, Chefe Unidade Asistensia Juridika, Administrativa e Pesquisa, Sra. Filomena Dias, Diretora Promosaun, Sra. Marina Bernadina Gaio.
