Treinamentu ne’e foka liu ba prevensaun korrupsaun, promove boa governasaun, no proteje direitus umanus iha ámbitu servisu públiku. Iha diskursu abertura, Sekretáriu Autoridade Ataúro, Vicente Sanches Soares, husu ba funsionáriu sira atu inkopora prinsípiu Partisipasaun, Transparénsia, no Responsabilidade iha sira-nia serbisu loroloron nian.
Espíritu kolaborativu hosi inisiativa ne’e destaka hosi Komisáriu ba Asuntu Disiplinár CFP nian, Agapito da Conceição, ne’ebé afirma, “Ekipa integradu ne’e estabelese atu koopera ba servisu públiku ida ne’ebé efetivu no efisiente liu.”
Provedór Virgílio da Silva Guterres “Lamukan” hato’o diskursu prinsipál ida hodi enkuadra servisu públiku nu’udar vokasaun ida. Nia invoka liafuan sira hosi Papa Francisco, “Sé maka la moris atu serbí, la serve atu moris,” no Samora Machel, “Ba servidór estadu nian sira, foku primáriu maka servisu públiku, la’ós benefísiu pesoál.”
Nia esklarese liu tan kona-ba instituisaun nia papel, hodi haktuir katak, “PDHJ la’os mai atu komanda, maibe atu oferese prespetiva. Ami sai hanesan matadalan, oferese konsellu ba autoridade sira nune’e sira nia servisu la’o tuir dalan ne’ebé loos.”
Treinamentu ne’e marka pasu signifikativu ida iha esforsu nasionál ne’ebé koordenadu, ne’ebé hetan apoiu husi parseiru internasionál sira, atu institusionaliza medida anti-korrupsaun no prinsípiu governasaun di’ak iha Timor-Leste.
This post is also available in: English