Ataúro – Provedoria dos Direitus Humanus e Justiça (PDHJ) liu husi Diresaun Nasional Boa Governasaun, Departamentu Promosaun no Edukasun, hala’o programa sosializasaun ba komunidade sira iha Sub Distritu Ataúro Distritu Dili iha fulan Maiu 2014.
Dr. Rui Pereira dos Santos, Provedor Adjuntu ba area Boa Governasaun hateten objetivu husi atividade refere hodi habelar informasaun kona-ba Papel PDHJ nian, Prinsipiu Baziku no Katergoria Violasaun Governasaun Di’ak, Direitus Humanus no Oinsa Prosesu atu Hato’o Kesar ba PDHJ.
Dr. Rui hatutan tan, servisu hirak ne’ebé PDHJ hala’o maka simu kesar husi sidadaun hotu kona-ba indikasaun violasaun direitus humanos no mal administrasaun, halo investigsaun, promosaun no edukasaun, halo monitorizasaun no advokasia no mos mediasaun.
Dr. sublina katak, tuir estatutu PDHJ katak rejultadu investigsaun PDHJ la halo desizaun, maibe rekomenda ba Ministeriu no instituisaun sira ne’ebe simu rekomendasaun PDHJ nian, sira mak sei hola desizasaun hodi implementa.
Tuir observasaun PDHJ, durante realiza atividade sosializasaun iha Sub-Distrito Ataúro, partisipante sira hato’o sira nia laran kontente no sente orgullu tanba bele hetan koñesimentu kona-ba servisu PDHJ nian no mos dalan oinsa atu hato’o keixa ba PDHJ. Nune’e komunidade sira husu ba PDHJ iha future atu kontinua realiza atividade sosializasaun ba komunidade sira iha Sub Distritu Ataúro.