Ataúro, 22 outubru 2024 – Elisabeth Soares Oliveira, feto ida ho tinan 31 hosi Usubemasu, Beloi, Ataúro hasoru dezafiu boot tebes tanba nia defisiénsia fíziku. Todan ne’e aumenta liu tan husi 2019 to’o 2022, bainhira nia lakon nia subsídiu apoiu ba defisiénsia tanba kestaun sira iha sistema bankáriu ni’an. Situasaun ida-ne’e halo nia ho nia inan faluk, Amelia, luta atu hetan sira nia nesesidade báziku sira.
Laiha rendimentu ne’ebé metin, Amelia sente sira nia sirkunstánsia nia todan ho klean. Auzénsia hosi apoiu finanseiru lori impaktu emosionál, hodi halo nia preokupa ho sira nia futuru ne’ebé la serteza.
Rekoñese nesesidade urjente ba asisténsia, rede apoiu husi eis PDHJ iha Ataúro lori Elisabeth nia problema ba PDHJ iha Dili nia atensaun. Halo atuasaun lalais, PDHJ envolve ho autoridade relevante sira hodi rezolve asuntu ne’e. Obrigadu ba sira nia dedikasaun, Institutu Nasionál Seguransa Sosiál nian toma nota, hodi permite Elisabeth atu hetan fali nia direitu sira no simu pagamentu retroativu sira ba tinan haat ne’ebé nia lakon.
Iha loron 22 Outubru 2024, ekipa PDHJ fila fali ba Usubemasu hodi haree Elisabeth no Amelia. Bainhira sira ko’alia ho Amelia, nia matan nabilan sinal ksolok. “Ha’u nia oan-feto bele asesu fali ba subsídiu,” nia hatete, agradesimentu suli hosi nia liafuan sira. Apoiu ida-ne’e hanesan liña salvasaun ida ne’ebé hamenus sira nia sofrementu.
Amelia hato’o agradesimentu ho laran hodi Elisabeth nia naran: “La ho PDHJ nia advokasia no governu nia apoiu, ami sei iha dezesperu nafatin,” nia hatete, ho matan-been ho alíviu iha nia matan. Subsídiu ne’e signifika esperansa, dignidade, no promesa ida ba futuru ida ne’ebé di’ak liu.
Istória susesu ida-ne’e maka testamentu ida ba kbiit advokasia no apoiu komunidade nian, ne’ebé destaka oinsá kolaborasaun bele muda moris no ajuda indivídu sira hanesan Elisabeth atu reklama fali sira nia direitu.
This post is also available in: English